مرحوم.. يا تاج الوفا

رثاء في والدي -يرحمه الله- أسأل الله العلي القدير أن يسكنه فسيح جناته
يالله يا عالم بمكتوب الأقدار
يا نافذ حكمه على أول وتالي
تجبر قلوب راعها هول ما صار
قسا عليها الوقت في كل حالي
يا قلبي ياللي شب فيه المزن نار
والحيل هدته الهموم الثقالي
اللي جرى للعقل من وقعه احتار
خلاني أصفق باليمين الشمالي
الوقت بدّل صفوة أفراحي أكدار
على مدى أيام العمر والليالي
يا كثر عشت وشفت حالي وإمرار
تطغى مراراته على كل حالي
عجزت أحاول أجمع اشتات الأفكار
رغم احتمالي حمل فوق احتمالي
أساير الدنيا على كل الأطوار
وهمّي يزلزل راسيات الجبالي
وأضحك وقلبي للحزن مسرح أدوار
أقول سالي بس ماني بسالي
ناديت وين اللي رحل عنك يا دار
من دار إلى دار وشد الرحالي
لازال يتردد صدى صوته إمرار
في كل من حولي وطيفه قبالي
يرضيك يصبح عذب الأيام تذكار
ردي عليّ غالي فقد شوف غالي
يا سرع دار الوقت والوقت دوار
أربع سنين اللي مضت باكتمالي
مرحوم يا تاج الوفى نسل الأحرار
أسياد قومه ساميات المعالي
دثرت بثياب الحزن دار وديار
عقبك وأنا كني وحيدًا لحالي
ليت الليالي علّمتني بالأقدار
وأعطيك ماضي العمر واللي بقالي
لو البكى ينفع وتنظيم الأشعار
تعيد لي روحي وشفي وحالي
فجرت من دمعي ينابيع وأنهار
وأسطر أبيات تفوق الخيالي
حلفت لازور القبر لليل ونهار
ورضاك يبقى مكسبي وراس مالي
الله في الفردوس يجعل لك اقرار
بأعلى المنازل عند رب الجلالي
وصلوا على أبو فاطمة سيد الأخيار
على شفيع الخلق يوم السؤالي
محمد رجب العويفي - جدة