حلول اللغز

نشرنا في عدد الأسبوع الماضي لغزا كتبه الشاعر منصور عبدالله المجيدل ونصه:
انا ابا انشدك عن رجل خذا من جلدها ثوبه
بناته وسط بطنه ما شكا من حملهن في يوم
بناته لو يخلنه ترى ما احدٍ يجي صوبه
وهو من هجرنا في وقتنا يا اهل الفكر مضيوم
وكان حله الكتاب وقد وصلنا الكثير من الحلول اخترنا منها ما اكتملت فيه شروط النشر فجاءت كما يلي:
تحياتي لمن ينظم لغوز الشعر مكتوبه
على صفحة جزيرتنا كما بدر عليه نجوم
وقد سماه ابوالطيب جليس الخير واقروا به
وحلّي هو كتاب العلم يا طالب تعرف علومه
علي بن صاحب العمري
الرياض
***
عرفنا لغز منصور وعطينا الحل مندوبه
نعرف الغاليه واللي رخيصه والثمن والسوم
عرفناه الكتاب افضل جليس يفيد مكتوبه
علومه نافعه للي يريد المعرفة ملزوم
نادر مسفر الحويماني
البجادية
***
جزيل اللغز يا هل العرف كل الناس فرحو به
عسى ربي يوفق للسعد منهو يصونه دوم
وانا منصور لو يضفي غطاه ويخلف دروبه
اقص الدرب قدامه وأجيب من الكتاب علوم
فهد الجروان
الزلفي
***
نرحب بالمجيدل صار حل اللغز مطلوبه
قريته بالتراث اللي توافينا بكل اعلوم
اقول انه كتاب الله قوي اللفظ واسلوبه
يريد المسلم القاري خصوصا في نهار الصوم
علي رشيد الرشيد
رياض الخبراء
***
هلا باللي كتب لغز جماله زاده عذوبه
بيوته كنها درٍ على عقد الذهب منظوم
عرفنا الحل يا منصور ما في حله صعوبه
وكتبنا حله بصفحة تراث اللي عساها تدوم
ألا يا حظ من يقرا الكتاب الزين باسلوبه
فهو خير الجليس اللي جليسه دايمٍ محشوم
عطاالله بن سليمان العطاالله
الزلفي
***
سلامي عد ما يشرق شعاع الشمس واغروبه
على اللي من سبب لغزه هجر عيني لذيذ النوم
سهرت الليل افكر به وصدفه بانت ادروبه
كتابٍ من قرا ما فيه حصل فايده واعلوم
محمد المجماج التميمي
الرس
***
ترى لغز الجزيرة واضح بحروف مكتوبه
كتاب فيه صفحات تزيد الناس زود علوم
كتاب الله اهم الكتب فيه التين والتوبة
عسى يشفع لمن يتلوه في يوم يجي مزحوم
سعد الكثيري
الحريق
***
إلى منا قرينا اللغز حله نعرف دروبه
وكل إنسان يلقى ما كتب قسمه المقسوم
وهذا الحل بأبياتٍ جزيلاتٍ ومكتوبه
حزامٍ للرصاص اليوم اقول إنه شبه معدوم
تركي بن سفر العتيبي