التانكي في موترك طافك اللوم ترى المحطة وأمه اللي تغذيه

كتب لغز الأسبوع الماضي للصفحة الشاعر خليف بن فهيد الحربي والذي يقول:
ياويش ورع مسكنه دايم الدوم
في وسط عودٍ وأمه اللي تغذيه
واللي تغذى يرفع الراس ويقوم
وإن نام نقص ضاق به صدر راعيه
زاده شرابه ماكلا أي مطعوم
والياحصل له نكبة قلت وش فيه
وتوصل للحل كل من:
أرسل سلام ياصل الآن لقروم
اللي لهم في بدع الألغاز تنويه
اللغز حله يوم فكرت معلوم
انبير للبنزين قدمك اراعيه
على الرشيد - رياض الخبراء
التانكي في موترك طافك اللوم
ترى المحطة وأمه اللي تغذيه
لامبير بعد الفل ما جاي به نوم
واللي مهدي في طريقك تعديه
وإن غلق البنزين في جوك غيوم
قبل المسير أقول شيك عليه
محمد عبدالله الشهري - أبها
يا اللي كتبت اللغز واضح ومفهوم
لغزك جزيل ومحكماتن معانيه
بعطيك حله يا ذرى كل مضيوم
رميت هدف لعل ماني بمخطيه
عداد للبنزين والعلم محسوم
يخبرك عن ما فيه من نظرتك فيه
منير بن مذكر متعب العضياني
أنا أشهد إن اللغر يا خليف محكوم
وخليتنا يا خليف نضبط قوافيه
احدن بحل اللغز له حظ يقوم
واحدٍ يجيب الحل واحيان يخطيه
أمبير بانزينٍ يغذّى على الدوم
واليا انقطع شانت أخلاق راعيه
عبد الله الفهيد - الرياض
ياللي طرحت اللغز واضح ومفهوم
أنبير البانزين وأمه تغذيه
وأنت انتبه لا تقول ما فيه معلوم
إليا طلعت البر لازم تمليه
محمد بن عبدالرحمن أبودحيم - البدائع
لغز الأسبوع:
كتبه للصفحة الشاعر علي الرشيد من رياض الخبراء ويقول:
ياويش بنتين لهن شان مسموح
مسموح يا هل العرف في وقت محدود
وحده تجي برضاك في ساعة البوح
والثانية تصدفك من غير مقصود
نستقبل الردود والحلول خلال أربعة أيام من نشر اللغز على الإيميل:
rb-khozama@alriyadh.com