جان الخبر

أخوي مات وكل خلق يموتون
دنيا الفنا سكه واخييِّ عبرها
يالله عسانا من هل الصبر والهون
حل القدر في يوم نصفٍ شهرها
جان الخبر بصبى عيني يعزّون
يا خوي أبو صالح على الله جبرها
مشيت معهم يوم راحو يصلون
وعند الدفن عيني ادموعه غمرها
والقلب دلا يرتجف تقل مطعون
بين الحنايا يصطفق في بحرها
وشكرت ربي ما حصل صار مسنون
ذي سنة الله عارفين خبرها
عشرة عمر يعلم بها خالق الكون
عشنا على صفو الليالي أوكدرها
ما يوم شفته عاتب اللي يسبّون
أيضا ولا شفته يثوّر غبرها
ما قيل أبو صالح اهروجه يقولون
وان جاه هرجه في ضميره قبرها
ياما تلقّا من مسابيب واطعون
ومما تحمّل عرق قلبه فجرها
يشهد له اللي في حياته يعرفون
وعند الجنازة كل منهم ذكرها
عساه في حل وانا منه ممنون
يالله تجمعنا بروضة شجرها
في جنة مثوى لمن هم يبرّون
وعساه يقطف من نواعم ثمرها
أخوي أحبه معذره صرت مجنون
محبة له كاملة في صورها
وعزاي باللي باقيين يروفون
هم مهجة بالقلب ربي حفرها
عسى البقا في روسهم دوم يبقون
تفتح مجالسهم بكامل نورها
وأنا لهم على الوفا دوم مرهون
من هو سهر عيني من أجله سهرها
وصلاة ربي عد من هم يموتون
واعداد حيين تهادو باثرها
على نبي داعي الناس بالهون
له سنة يا سعد من هو اعتبرها