موته مفاجي

قصيدة عزاء للأخ: متعب بن بجد بن قرناس وإخوانه وأبناء الشيخ المغفور له بإذن الله فيصل بن بجد بن قرناس الذي وافته المنية يوم الأربعاء الموافق 29-2-1427ه.
{ إِنَّا لِلّهِ وَإِنَّا إِلَيْهِ رَاجِعونَ }
الصبر يا متعب ترى الصبر محمود
والله وعد للصابرين انفراجي
الموت ما عنه ملاذٍ ومصدود
ما له طبيب ولا له ايضاً علاجي
حوض سبقنا ورود وحنا له ورود
وكل يبا يعرض نهار التناجي
راحوا زمان وفود قافيهم وفود
وباقي مآثرهم سفته العجاجي
دربٍ نبا نمشيه شايب ومولود
ما فيه واحد يا بيض الوجه ناجي
تجبر عزا ماجد وتجبر عزا سعود
وتجبر عزا إخوانه بصبر العواجي
وتجبر عزا عياله من صغير لحمود
فبوهم اللي صار موته مفاجي
وترحم بمن صلوا على موته حشود
وسط النسيم بجنب سوق الحراجي
يوم الخميس الظهر حطوه بلحود
تحت الثرى وحده بليا مناجي
عبدٍ قضى وقته لك ركوع وسجود
حسن الخلق للضيف سمح الحجاجي
ذباح حيلٍ لا فعل شي من جود
فعله زلال ولا دخلبه هماجي
ما يلحق المقفين شرهة ومنقود
ولا هو من اللي بعرض الاجواد هاجي
حكيم راي وعنده العرف موجود
لا حل في مجلس به الكيف راجي
سيق المهيل ثم بعد ساقوا العود
سوالفه تطرب فطين المزاجي
سوالفٍ ما هي على كذب وحقود
وللجار حق وله على الرأس تاجي
للجار قدر وجاره العبد مسعود
مضرب مثل للي عليه احتجاجي
هذا قليلٍ من كثيرٍ له شهود
يا الله بلطفك والعفو والخراجي