مبداي باسم اللي فرج عن هل الغار أعوذ به وألوذ به واستخيره قدام تدريج المعاني بالاشعار عن لا يجي عندي من الأمر حيره حتى تجيني طوع من غير عسار وتنقاد لي قود الجمل بالمريره وعلقتها في راس دواس الأخطار عبدالعزيز اللي فعوله شهيره يوم إن بركان الفتن بالوطن ثار ما فيه شبرن ما اشتعلبه سعيره ولا للجنايز بين الاشرار قبار ولابه عشيره تتفق مع عشيره حناشل تاقف على كل معبار وتحول الطرقي وتاخذ بعيره من شرق فاجاها عل هجن ومهار هجن هجاهيج وخيل مغيره فوق الجياد وفوق نساع الأزوار داس الخطر وأطلق حصار الأسيره جاها صلاة الفجر والطير ما طار بكل أبلج بيديه دلما قصيره جوها مع الأسحار وخذوا لها الثار وعقب العري لبست ثياب الستيره ويوم احتضنها المؤمن العادل البار قامت لخو نوره تغطرف منيره حشيمةٍ ما تقبل الذل والعار وبه من بعض خطابها مستجيره وغدالها عن كل حجير حجار وسعى لها بالنصر والله نصيره واستامنت بحماه عن كل غدار وعن الشلل عالج عضاها الضريره احد الي جار الدار للدار دمار واحد الي جا الدار شاد تعميره والفيصلي للمملكة شاد الأعمار حلحيل ما سوى سواياه غيره صميدع جاها وهي تلتهب نار وارسا قواعدها بعزم وبصيره وعلى يد المنصور توحيدها صار وظفا عليها الأمن في كل ديره شيخ على السنه نهج نهج الابرار وعلى مخالفها يجر الجريره عسى عضاه محرمات على النار يوم ارتحل عنها ذخر له ذخيره وذخيرته روس الميامين الاخيار على مساره يكملون المسيره وكلٍ حكم له دور من خمسة أدوار وكلٍ عدل في دوره اللي يديره واليوم واحات مظاليل وانهار بفضل الولي ثم بالجهود المنيره الدولة اللي تحترم جيرة الجار يوم بعض الجيران ياكل قصيره ما ساد الاستعمار فيها ولاجار ولا عاش فيها من بذوره بذيره حره واهلها من على اولهم احرار في ظل شذرات السيوف الشطيره يوم ارتحل مسقى العدا كاس الامرار فهد عسى الله عن عذابه يجيره راح وبقت معنا حسانيه تذكار وخلد لنا في قمة المجد سيره كم مرفي عهده من احداث كبار وصارت كبايرها بعينه صغيره اثقل على العدوان من ضلع سنجار ولشعبه احلا من برايد غديره واكمل مساره طيب الصيت والكار كشاف خصات البيوت الفقيره عبدالله اللي عاهد النافع الضار الخير من يمه لفانا بشيره العدل نهجه والتواضع له شعار ونباه يجبر له عضام كسيره على الفقارى مثل هتاف الامطار وضاف على اوطان المحاويج خيره وعنده لخصات المقلين منظار وجزلات مداته عليهم كثيره فاول بيانٍ له بنشرات الاخبار قال البيان اللي غمرنا عبيره يقول مدوني بالانصاح والشار ومن الدعا الصادق عطوني بريره وحنا بنفحات التهج بالاسحار نطلب له التوفيق فيما يديره وعضوده اللي فالمواجيب حضار سواعده عند اشتعال الذخيره الساعد الايمن ليا صار ما صار سلطان زيزوم الدفاع ووزيره سلطان أبو خالد له الرأي يندار ولي عهد له وأخوه وشويره فالنايبات مجهزا كل مغوار النائب الأول نزيه السريره يقود جيش للوطن درع وستار يصد به عنا الخطوب الخطيره ونيابةٍ عني وعن كل من زار حفل الرياض وباسم سلمان أميره قدمت لي معذار ما هو بمقدار ولا حقوقك يا بو متعب كبيره وصلوا على سيد البشر سر وجهار ما طوح الصقار ملواح طيره
