علم يا ليته ما وصل

قصيدة رثاء في العم الشيخ عبد الرحمن المحمد القميع رحمه الله..
يالله ياللي تفرج الضيق يالله
يا واحدٍ يرجيه من كان مهموم
بديت في ذكرك وهو خير مابداه
يسر علي ولا تعزر بمحروم
انت الذي كل المخاليق تنصاه
ولا خاب من ينصاك يا حي قيوم
يا الواحد المعبود لا نعبد سواه
يا منزلٍ طه ويس والروم
ياسامكٍ سبع بلا عمد خلاه
انت الذي تبقى على الكون وتدوم
بامرك مشى كل الفلك حيث مجراه
يا مسيّر خلقك على حساب معلوم
عبدٍ نصاك وجاك من عظم بلواه
يا منجي يونس وهو كان ملهوم
آمنت بك والموت حق رضيناه
كل البرايا تمشي بدرب مقسوم
علمٍ لفاني غمّ قلبي وعنّاه
ليته كذب ليته اشاعات ووهوم
علم يا ليته ما وصل سمعٍ اوحاه
ماهو كفر لكن تمنيته حلوم
قالوا توفي عمك اللي دفناه
حدر النصايب هلوا تراب وردوم
غديت مثل اللي طريح بمضماه
والقلب عذقه من قسا العلم مصروم
بعض العرب لا مات حزنه نسيناه
والبعض حزنه بالحشا عايشٍ دوم
ياكثر من موته كما ذبحة الشاه
والنادر اللي موتته هزت رجوم
بعض الحزن يجزيه دمعٍ ذرفناه
والموت حزنه داخل الصدر مكتوم
يا قبر ياللي فيك شخص تمناه
كل البرايا والملا كلها عموم
يا قبر جالك ضيف طالبك ترفاه
وسّع له ركونك ونوّر له عتوم
يا قبر وص الدود لا ياكل عضاه
بلغ وصاتي كود ما يلحقه لوم
لا ياكل يدينٍ على الخير ضرّاه
ولا ياكل لسانٍ عن الشر مخزوم
ولا ياكل عيونٍ بكت خشية الله
ولا ياكل لهاةٍ سلب ريقها الصوم
يا قبر علّ ارضك بها العشب يزهاه
عسى الولي يسقيك ويامر لك غيوم
ترى عزانا يوم حنّا حملناه
على النعش خلقٍ مشى مبلل كموم
ليت القصايد ترجع اللي فقدناه
كان اشعل الساحات والقاف منظوم
ولّديت يم القاف ملزومٍ انخاه
وقلت ارث منهو بالمدايح له رجوم
ومني تعذر قال وشلون عزاه
مالي على طيبه مقادير وعزوم
قلت اوصفه بيوت واذكر سجاياه
كانك تبي ذكرك مع الناس محشوم
ثم التفت يمّي وهو فاتح فاه
قال انشد الخبراء وتنبيك بعلوم
ونشدت انا داره مداهيل مرباه
يا دار من برّك من عيالك اليوم
قالت سؤالك يا فتى كيف ترضاه
اسحب كلامك والخبر صار مفهوم
ذاك القميع اللي عسى اللاش يفداه
ويفداه من يشكي من الكبر والزوم
شد بيدي يم الحضارات مبداه
ولا دخر مالٍ عطاياه بالكوم
كم من يتيمٍ دون ربعه تبنّاه
كنه حفيده ما دروا ساير القوم
تبكيه كل الخلق قاصيه وادناه
وتبكيه ريضانٍ ويبكنه حزوم
والبل يبكنّه ويبكنّه حماه
وزرعٍ فقد ماطاه يبكيه مكلوم
وا عمي اللي فقده العين قزاه
كثر السهر ارسل على عيني سهوم
وا عمي اللي كل ما جيت ابسلاه
يمرني طيفه وانا بحالي النوم
وا عمي اللي كل ما قلت ابنساه
جمايله زعلت وانا اصبحت مليوم
وا عمي اللي لا قسى الوقت عزناه
فزاع نطاح المواجيب ويقوم
وا عمي اللي تذرف السمن يمناه
يذبح سمين الحيل والضيف مكروم
وا عمي اللي لا لفا الضيف حيّاه
هلاّ ورحب الفرح فيه مرسوم
وا عمي اللي دلته دوم مركاه
فنجالها يطرد تناكيد وهموم
وا عمي اللي لا شكا الضيم من جاه
يرد من حقه غدا منه مهضوم
وا عمي اللي شكا العوز يكماه
ماصك بابه دون شيخان ورخوم
وا عمي اللي حايز المجد والجاه
الا تزهل فاحسب الوضع محسوم
وا عمي اللي كان جاره تبلاه
يدمح خطاياهم تقل صار ملزوم
وا عمي اللي من نشد عنه زكاه
كلٍ على طرياه قفّاه بنعوم
وا عمي اللي كاسب الصيت طرياه
ذكره عطر فواح ما هوب مذموم
وا عمي اللي نادر في حلاياه
كريم سبلا جنسه اليوم معدوم
وا عمي اللي كل من عد حسناه
ضاع العدد والفكر تايه ومنجوم
عمي توفي والخلف طيب مجناه
ترى العوض عن راسه عيالٍ قروم
يالله عسى الجنة مقرّه ومثواه
آمين يا ربي عسى العود مرحوم
تمّت وصلّوا عد ما ينتثر ماه
على النبي وعداد ما تلمع نجوم