تعزية وبيعة

يذكر التاريخ حبر أقلامها
الشهادة من حضرها ما كتم
في بحرها هاجسي عوامها
لو كلي حزن وآهات وألم
والجزيرة وأهلها وحكامها
خادم البيتين تنعاه الأمم
الملك فهد العرب وإمامها
هو فقيد الناس من عرب وعجم
نكست كل البلاد أعلامها
المليك العادل الحر الشهم
حكّم الشورى وصاغ إنظامها
من كتاب الله مع السنه حكم
والشريعة كلها وأحكامها
عمّر الصحراء وهي كانت عدم
فكّر وخطط وجاء قدامها
السعودية عمرها ما هدم
في مدارسها وكل أقسامها
بين شعبه بالعداله ما ظلم
طوّر وحقق جميع أحلامها
لين رفرف في سماء العز العلم
زاد خيرات البلد وأنعامها
فيه دين وفيه جود وفيه حلم
مغني الرملاء ومغني أيتامها
فيه صبر وفيه حنكه مع عزم
كم سهر من ليلة ما نامها
فيه خصله من خصال المعتصم
حرر الجاره وهد أصنامها
في الكويت الفهد من هد الصنم
من بيارقنا انهزم صدامها
لو سمع نصيحة الراحل سلم
ولا سلم عقب الغزو بأعوامها
كم نعدد للفهد يا كم وكم
عد غيب نجومها وأرقامها
الأمن في المملكة والخير عم
والشريعة سورها وإحزامها
وسّع بطيبه ووسّع في الحرم
والعروبه عزها باسلامها
والقصايد كل شاعر به نظم
في جنوب الدار وإلا شامها
يصبر المسلم على كرب وهم
والليالي ما تدوم أيامها
يا عسى قبره من الجنة نسم
في رياض الخلد وسط أنسامها
للشعوب المسلمه يبقى هرم
في عقول الناس مثل أهرامها
وللحرم والمسجد الأقصى خدم
أسرة آل سعود هم خدامها
الملوك أهل المكارم والشيم
للضعوف بيوتها واخيامها
يا أبو متعب كلنا قلنا نعم
ما يسود إكرامها إلا إكرامها
ويا ولي العهد سلطان الكرم
يا وزير الجيش يا مقدامها
قدم حاكم نجد في قصر الحكم
بايعوه إشيوخها وأعلامها
بايعوا من بعد عزّوا في العلم
من يمينٍ ما تخون إبهامها
بيعةٍ فاعناقها دين وقسم
شعب للبيعه تسير أقدامها
بيعة الأجداد مكتوبة بدم
ثابتة بأقوالها وأختامها
في الحروب الطاحنة ما ننهزم
دام كل الروس فوق أجسامها
في سبيل الله سيّرنا القدم
هاذي الأرواح يا سوامها
في عيون اعداك يالعاهل سهم
ومن يحج البيت لبس إحرامها
والنبي من حفظ هديه ما ندم
للذلول اعقل وهد إخطامها
شعبكم في صف واحد ملتحم
عهدكم على الصدور أوسامها
بالمواثيق المتينة ملتزم
في شمال الدار وإلا يامها
ما يصون العهد غير المحترم
يا حجاب المملكة وحسامها
طال عمرك للوطن واسلم ودم
للشعوب المسلمه واسلامها
وللرسول اللي من الزله عصم
التحية والسلام ختامها
منصور بن محمد بن منيخر/ مركز هيت