إرهاب الأمة

المجد له كفٍ تشيّد مبانيه
والعزم له شيخٍ يشيل الثقيله
يا سيدي يا شيخ مجدك وراعيه
مجدٍ بنيته منهو يقدر يزيله
حنّا فداك ولابه اللي نفاديه
إلا وطنا كلّنا في سبيله
يرخص له الغالي ويطلب ونعطيه
ولا خير في نفس بعطاها بخيله
ولا خير باللي خان دينه وواليه
وصارت طواغيت البشر هي دليله
حتى طريق الحق ضيّع مباديه
ونفسه غدت لبليس دومٍ ذليله
مرّه يبيع الدين ومرّه بيشريه
لا هو عمى ولا مبصرٍ وش حصيله
غرّه سفيهه لين قيّد أياديه
ومنهو يبا حيله بيلقى له حيله
اختلّت أفكاره وسط سكة التيه
ولا عاد يفرّق من عدوه وخليله
الفتنه نارٍ تاكل اللي تلاقيه
والكف تلمس جمرها ما تشيله
فكرٍ دعا للمذبحه وش نبي فيه
وإرهاب الأمه خاب مشعل فتيله
شخصٍ ذبحه الفسق الله يشافيه
وشخصٍ ملاه الحقد الله وكيله
كلّن له الله والله اللي يجازيه
والحق حق وواضحٍ في سبيله