حيْ ذاك الجبين وميلة عقاله

انتظرنا وجانا العيد في حله
جيت يا عيدنا اللي نرقب هلاله
يا أبو متعب لفيت وحي هالطله
حي ذاك الجبين وميلة عقاله
التراحيب فاحت فوحة الدله
مرحبا من ضميرٍ فاحت دلاله
رحبت مملكتك وشعبها كله
كل رجال قام يبشر عياله
في قدومك سحايب غيث منهله
ديمةٍ بالسعد والخير هماله
وامست كبودنا رطبه ومبتله
واحتفل كل بيت وزانت احواله
واجتمعنا وبان العزم والذله
وخاب ظن السفيه النذل وامثاله
خاب ظنه وظن اللي يطبل له
نذل واللي وراه أنذال وحثاله
مادرى إنا نسن السيف ونسله
لين شاف الصحيح وغير اقواله
خل منهو يبا تفريقنا خله
يشرب المر من كاسه وفنجاله
إيه خله عساه يموت من غله
الفشيله بوجهه والردى فاله
خاب منهو يخون العهد والملة
وعاش هذا العرين وعاشت رجاله