(حي الملك)

مولاي خادم الحرمين الشريفين الملك عبدالله بن عبدالعزيز
إنه ليسعدني ويشرفني أن أقدم لمقامكم الكريم هذه القصيدة المتواضعة معزين في فقيدكم وفقيدنا وفقيد الأمة العربية و الإسلامية
الملك فهد بن عبدالعزيز « رحمه الله »
ومبايعين لكم على السمع والطاعة أطال الله في عمرك وأبقاك الله ذخراً لنا وسنداً لدولتنا وشعبكم الكريم...
حي الملك وجه الشرف والزعامه
إعداد ما ترعد ويبرق مخيله
وإعداد ذرات الرمل بالثمامه
وإعداد ما مالت غصونٍ ظليله
وإعداد ما طار بسمانا حمامه
وعد المطر في ودايٍ سال سيله
وعاين بها الراعي بروق الغمامه
أنت الكرم وأصل الكرم يا جزيله
نور البلاد وظل قصر اليمامه
أنا أفتخربك وأنت راعي الطويله
يا خادم البيتين وأنت حزامه
سوره ذراه أعن النفوس الذليله
الدين عندك يا مجود خطامه
شلت الأمانة والحمول الثقيله
مشيت شرع الله ومنهج أحكامه
دستورنا القرآن مافيه ميله
شعبك تحت ظلك تعلا مقامه
منّك خذا كل الفعول النبيله
وأنته ليا جانا المعادي كعامه
عوقه وشره موت وأنت قبيله
يا سقم من نفسه تريد الندامه
بأرض الوطن لا هاز واعزتي له
أنت البحر لا هاج وأظلم لطامه
وأنته كما ليثٍ وثب من فصيله
وأنت البدر إليا أكتمل في تمامه
نوره علينا ضاويٍ كل ليله
وأنت على العدوان سيف بِصَرَامه
تضرب ولا تخشى إبليس وسبيله
وأنت الحكم وأنت العدل في خصامه
وأنت لنا ميزان موفي بكيله
مثلك أبد ما ينثني عن كلامه
لو جات في ضرب السيوف السليله
يا معرب الجدين خال وعمامه
يا مسند اللي لا انكسر فيه حيله
الشعب في حبك تزايد هيامه
أنت الذي برواحنا نفتدي له
يا أهل الوفا وأهل الفخر والشهامه
لك في دروب العز قدر وحصيله
يا للي رقيت المجد بأعلى سنامه
تشيل حملٍ غيرك أزرى يشيله
لك من صميم القلب كل احترامه
مزنٍ من المنشا تطلق هميله
طلقٍ احجاجك والمحيا ابتسامه
عين العديم اللي وصوفه قليله
يا غيث من حده زمانه وضامه
يا ريف نفسى يوم نفسي عليله
انت الزعيم اللي رفيعٍ مقامه
شفنا فعولك بين يومٍ وليله
نظمت قافي لاجل تجلي ظلامه
وتحلها وإن كان جت مستحيله
يا سعد عين اللي تكدر منامه
يا عون من قلّ اجتهاده وحيله
والعبد لوانة يشوف انعدامه
مكتوب ماله غير ما يستوي له
والوقت نبغا صفوته واغتنامه
يا ابن الذي خلا العداله سبيله
راعيت يا شيخ العرب لليتامه
واخذت من حاتم خصالٍ فضيله
كم قام بيتٍ قمت به من هدامه
وبنيت ساسه بعد ما مال ميله
حكام باذن الله ليوم القيامه
حكمٍ وعهٍدٍ ماندور بديله
نلت الشرف والطيب واعلا وسامه
وانته اليا صكت علينا نجي له
نبع الصخا والجود نبع الكرامه
يا احد من كل السيوف الصقيله
با لفرقدين اسمك نشوفه علامه
سجل لك التاريخ صورة جميله
يا شيخنا والليل طول عسامه
وأنت الملاذ لحايرٍ طال ليله
تستبشر حروفي فخر من تهامه
للحاكم اللي ما نلاقي مثيله
الحاكم اللي ما غفا في منامه
لا شاف مضيومٍ وحاير دليله
نار الكرم باقي وباقي زمامه
احيا ملكنا شعلته والفتيله
فهد رحل ونبايعك في نظامه
بيعة وفا من روسنا والقبيله
مرحوم يا راسٍ علا كل قامه
مرحوم ياللي ما يخلي دخيله
فهد الفهود إن جات عند الكرامه
اشهد شهادة حق يبرى غليله
وسلطان سلطان العرب يا حسامه
خيرٍ تمد ايديه ما هي بخيله
ينوب عبدالله وأمين لمهامه
عقب الفقيد اللي فجعنا رحيله
يا شيخنا والعمر محسوب عامه
يا نسل من خلا العرب تهتوي له
كان الوطن متشتتٍ بانقسامه
ولَيّم شتاته بالسيوف الجليله
عبدالعزيز الله يرحم عظامه
عساة يسكن بالجنان الظليله
والشعب حبك دام عزك ودامه
انت الذي واجب علينا نعني له
جيتك بقلبٍ حاير الهم ضامه
يا المزبن اللي بالزمن نلتجي له
يوم إن كلٍ قال وشبه علامه
ما فيه غير اللي خلق يشتكي له
ثم اشتكي لك قبل عض البهامه
همي وغمي وانت راع الكحيله
وختامها لك دعوة بالسلامه
عد البيوت وعد فرض ونفيله
الشاعرة/ الجوهرة بدر مطني عاصي بن شريم