رياض المجد,, عاصمة الثقافة في جو القصيد

يختال الشعر في الرياض ويأبى الا ان يكون في اجمل صوره واقوى معانيه,,وهو يتباها في اميرها امير نجد المحبوب صاحب السمو الملكي الامير سلمان بن عبد العزيز وكيف اوصلها الى قمم المجد فأصبحت عاصمة للثقافة العربية.
ومما حمله بريد المدارات عن الرياض واميرها بمناسبة اختيارها عاصمة للثقافة العربية لعام 2000 اخترنا ثلاث قصائد أولاهما للشاعر خلف الأسيد الشراري حيث يقول:
العالم اجمع مير ما هي غريبه
هذا المكان وعام الالفين ميزان
الكاس في ميدان نجد العريبة
ما هان نجد وراس سلمان ما هان
ابو فهد شيخ الرياض الحبيبه
دار الثقافة والوفا عبر الأزمان
دار السلام ودار من جاه ريبه
يلقا بها عن جاير الوقت مزبان
دار العرب من كل صوباً وصيبه
بكفوفها ما فرقت بين الأخوان
دار العلوم العلم فيها نصيبه
فاق الشموخ بكل موقع وميدان
دار الفخر قمة وقيمة وهيبه
اللي رفع من شانها عالي الشان
وجه الحضارة للزمن مستجيبه
بنيانها يعلو على كل بنيان
دار العطايا بالعطايا وهيبه
من غير منه مدت العون باحسان
هلت على الشيشان وأروت شعيبه
والبوسنة وايضاً فلسطين وافغان
تفضيلها بالكون كل رضي به
دار الرياض العاصمة نور الاوطان
دار العدالة عدلها نقتدي به
سلطانها في مقطع الحق سلطان
بالحلم والحكمة يحل الصعيبة
للمعرفة مرجع وللطيب عنوان
حرٍ شمر في نجد مدمي حريبه
ما هان نجد ورأس سلمان ما هان
خلف الأسيد الشراري
***
أما القصيدة الثانية فللشاعر نايف بن ماطر الحلفي:
رياض المجد
مبروك يا دارٍ على قمة طويق
على اختيارك عاصمة للثقافة
انتي رياض المجد ما فيه تبريق
من يوم كان السيف يقطر أرعافه
واليوم مثل الروض عشب وزماليق
فيك التطور كل من جاك شافه
يا عاصمة ملك الوجيه المطاليق
آل السعود مشرعين الضيافه
حكام شرع الله وحفظ المواثيق
ولهم على جمع الضديد انعطافه
وبجهود من يثني اليا ذلهب الريق
اميرك اللي ما يحسب الكلافه
صرتي محط انظار كل المخاليق
وجا لك من امجادك بعيد المسافه
ومن البهى لبسك عقود وعشاريق
اجمل بلاد الكون شكل ونظافه
جهد زهى مجدك بحنكه وتدقيق
فعل تبين فيه فكر وحصافه
دمتي بظل اهل السيوف المذاليق
روس الملوك مقومين الخلافه
نايف بن ماطر الحلفي
القصيم العمار
***
وثالث هذه القصائد للشاعر صالح سفر العمري:
حب الأمير وحبك أنتِ فتنا
لك يا الرياض الكل بارك وهنا
وجو القصايد فاح عنبر وكادي
الشعر طاب وطاير السعد غنا
برياض عشق انظار كل العبادي
يا نجمة الالفين يا أحلى مدنا
فصل الثقافة واصلها في بلادي
يا مجدنا يا عشقنا يا شجنا
يا نسل حاتم يا نسب بن زيادي
يا عاصمتنا يا منارة وطنا
يا شجرة ملوك تغيث المنادي
سلمان يلقاه اجزل الشكر منا
اللي ملبسك الثياب الجدادي
حب الامير وحبك انتي فتنا
حبك وكيد وحب اميرك وكادي
ومحبة آل اسعود فيها علنا
بيضا لها لون اللبن والزبادي
يد واحدة حب الوطن يحتضنا
مانختلف متشابكين الايادي
قوم ولو قشر الصواديف جنا
نقدر نحل المعضلات الشدادي
قل للحسود اش وده يقول عنا
وقل للعدو حنا السباع العوادي
لغير الاله رقابنا ما تحنا
والمملكة عنها بدمنا نفادي
معنا الله القهار يا ممتحنا
ومعنى حديث الأسلحة والعتادي
أمن وأمان وطاعة الله رسنا
ونار تلظى في نحور الاعادي
الله وهب للمملكة ما تمنا
وختامها صلوا على خير هادي