غبتي وجيتيني

بعد طول غيبات
ياغايبه عن غيبتك حدثيني
اشوف بعيونك ندم وانكسارات
توّك تحسين بشقاي وحنيني
توّك تعرفين الغلا والتنهات
توّك تعرفين الغرام وتجيني
غبتي ثلاث سنين في صمت وسكات
وانا على لاماك افرك يديني
اسأل ونشّد والأمل مابعد مات
عندي أمل في رجعتك تحتويني
اسهر واعاني والمدامع هميلات
واقنب واجر الصوت مالي عويني
فكري تشتّت بين غفوه وسجّات
صدّك ثلاث سنين قطّع وتيني
كذا تركتيني اعيش المعانات
حتى جليسي شاف حزني بعيني
اسهر وافكّر والليالي طويلات
بين الهجير وبين عتمة سنيني
ازعج لك حروف التباريح بابيات
ماكنت اظنك ناوية تتركيني
فجأة تغيرتي علي دون سيّات
مدري وش اللي صار بينك وبيني
غبتي وجيتيني ندم وانكسارات
ياغايبه عن غيبتك حدثيني