السنين دروس يا عمري اللي فات

اثاري السنين دروس ياعمري اللي فات
ولا قلت لي كيف آتعلم من سنيني
ابسألك هي كل البشر او انا بالذات
تعمدت تتركني يلين ذبلت فيني
ورود الحياه اللي تجاهلتها بسكات
وخليتها تييبس على راحة ايديني
انا كيف اواجه بالوهن كل ماهو آت
وادل الدروب اللي لنفسي توديني
وانا فاقد كل الثقه والزمن عثرات
توالت بدربي لين ضيعت انا ويني
اذا كل عمري ليل وسنينه العتمات
انا كيف ابتبع ليل عمري يقديني
انا آسف لكل البشر مامعي وقفات
احاكي بها اللي ناوي انه يحاكيني
انا عادني مولود ماصار لي ساعات
ولا باقي الا يوم وادخل ثلاثيني
ثلاثين عام برحم دنياي والحسرات
تجسد ملامح رحلتي قبل تكويني
خذيت اكثر الصح بحياتي من الغلطات
وخذيت اكثر الغلطات من معمعة عيني
انا أضعف من النفس في عالم اللذات
تقاوى علي من ضعف نفسي شياطيني
ولا جا يقيني يوم ما زادت الزلات
يسد الدروب بوجه من كان يغويني
وأنا احوج الخلق الفقيره إلى الحاجات
وأنا اغنى من الأغنيا في كبر ديني
تنامى لذهني في كثير السكات اصوات
ولكن ولا صوت يوصل لي عويني
سراب وتهيا لي بتاليه شلالات
ومن خلفها تقبع حدايق بساتيني
فواكه تدلى من عناقيد حمضيات
تساقط بعضها قبل مامد كفيني
تعشمت فيها بس ياخيبة الهقوات
خيالات دربي واحسب انها عناويني
ملا الخوف صدري كلما ذكرياتي جات
من الماضي اللي يجعل اليوم يرثيني
يكفي خسرت اسنين تنعد بالعشرات
ويكفي كسبت آثآم ماعاد يمديني
اصلي لاجل غفرانها والعفو عبرات
تشق الحناجر لين تنزف شراييني
انا ودي انسى واتعود على الاهات
واقول اللي راح يروح ماعاد يعنيني
واذا في ليالي عمري اللي مضى لوعات
تفاءلت في باقي لياليه تعطيني
ثلاثين غيمه تكرم القاع بالقطرات
تبل العروق الناشفه بي وترويني
عسى الجفن من بعد الثلاثين عام ايبات
وعسى الروح تقوى بالجسد لين تكسيني
بفضفاض ثوب ابيض يلم بي الاشتات
بعد غيبة العمر الطويله الاقيني
ومدام السنين دروس ياعمري اللي فات
انا طالبك في اللي بقى لي تراعيني