غاية الكيف

عبد الله بن عون

مع هجعة اللي يختفون أول الليل
الغايبة دايم يغيبون معها
النفس تاقت للسمر والتعاليل
والعين أشوف النوم خالف سنعها
وطاب الجلوس بجانب النار يا شعيل
وحط الحطب في ترعة من ترعها
وإليا استوى للجمر فيها تحاميل
وأقبل تواهجها وقفى ولعها
درّج على المحماس من غير تعجيل
برية دوب اليماني قطعها
أول قطاف سفوح شم الأقاذيل
اللي جذا حوم الوحش عن فرعها
شم يساقيها السحاب بهماليل
لين يتحدر سيلها مع تلعها
وترى لحمستها نظام ودواليل
وشريعة يمشي بأثر من شرعها
أول بدايتها مدافع مخاليل
ومسرى جماميل بغالي سلعها
وسوقٍ كما سوق الجمال المحاميل
ما زال حمو النار ما قد لذعها
وإليا تطلق من شذاها زعاجيل
وبشّت عرق واللون الأشقر نشعها
فالحال سهلها عن النار تسهيل
حتى لظى المحماس ما يدّرعها
وغير لها يا شعيل مسرى الجماميل
بطراق زلباتٍ تزايد فزعها
تدريجة الحيران ومطارد الخيل
هذي طريقة حمسها واتّبعها
وعقبه تميلها على النجر تمييل
جذاب روس القوم من منتجعها
عوايد له من على سالف الجيل
ما هي حديثة تونا نبتدعها
ومن يوم تنعمها فدوك الدعابيل
فوق أصهب اللون الربيب تهزعها
وتضبط قياس الما لها بالمكاييل
ضبط الخبير لصنعةٍ مخترعها
ومن يوم تقطع خلها مثل ما قيل
ترخي على هدفي السبيل مخذعها
مبهارةٍ تذعر بغالي التشاكيل
طب العماس إليا تيسر تبعها
صفرا كما القنديل حسنا تعازيل
من صنعة الرسلان الأول صنعها
إليا دارها اللي يعتني بالمعاميل
وفاحت وبالفنجال الأول ردعها
وفيها تساوت خنة البن والهيل
والنفس دافعها عليها دفعها
قم صب لي ياشعيل منها فناجيل
على سنا ضو تهادى ولعها
أظنها يا مال طول التماهيل
تقلع همومي كان ربي قلعها
وتفتح لها أبواب بصدري مقافيل
وتجمع لي أفكارٍ تشتت ضيعها
وآخذ بها عن ضيقة البال تبديل
وصروف دنيا ما مشت مع سنعها
دنيا تصيّد بالشبك والمحابيل
ناس تسايرها وناس تخدعها
أحد تجي له بالرضا والتساهيل
وهو لو تعب في جمعها ما جمعها
وأحد ركابه مقفياتٍ مقابيل
ولا باب ولا نافذة ما قرعها
وتعطيه قاف إليا طمع بالمواصيل
وينكف معيف وسامحٍ من طمعها
دنيا تقذل سبق الحر تقذيل
وتوهنه في ربعةٍ من ربعها
لو قد مضى له من شقاها غرابيل
يوم الحرايب مظلماتٍ قطعها
يوم الطلوع بها على الهجن والخيل
ما قد فهق عن طلعةٍ ما طلعها
ويوم استقرت وأغدقت بالمحاصيل
صارت منافعها لمن لا نفعها
عقبانها تمسي قوايا مواجيل
والمستفيد غرابها مع امرعها
واللي مسار أمورهم بالبراطيل
واللي متى ما وافقت له بلعها
ومن ذاق در المرزمات الاباهيل
أما حلبها حلب والا رضعها
وحصنيها يرقص على هزة الذيل
ولو يجتمع قدمه سباعٍ سبعها
ولا عندنا ياشعيل للعوج تعديل
ما زال ممشاها على العدل اطعها
ون شفتها قامت تجانف على الميل
بأردى ثمن عند أول السوم بعها
واستثن منها قومةٍ بآخر الليل
في حزةٍ كلٍ يحب يهجعها
إليا جا لثلث الليل الآخر تراتيل
وقامت ملايكة الرضا قمت معها
في ساعةٍ تكبيرها والتهاليل
يجنى ثمار عذوقها من زرعها
وخل اجتماعك بالرجال الحلاحيل
اللي خيار المجتمع مجتمعها
ولا تبدي الشكوى ولو ضامك الشيل
إلا على رجل يحس بوجعها
رجل إليا التفت عليك النشابيل
أما شبرها شبر وإلا ذرعها
واختار مفتاحٍ للاريا المقافيل
روس العلا يرقيك في مرتفعها
ومن الزمان اخذ العبر بالرحاحيل
اللي منازلهم تهاوى بقعها
يا فجعتي لاجيت بعض المداهيل
ولا شفت فيها عقب حي رتعها
إلا رسوم دارساتٍ مساميل
وخرايم يزمى السراب بشمعها
بلاقعٍ شهبٍ تهاوى زهاليل
الظّاهر أن اللي فجعني فجعها
من عقب أهلها لو سقتها المخاييل
مالله نفعها وبركتها نزعها
لا جيتها جض يت من قلة الحيل
ودنياي عندي ضاق بي متسعها
على حلاحيل تضد الرجاجيل
حصن ما عاد إلا مقالع شيعها