يالله عسى قبره رياض وميادين....وفي جنة الفردوس عال القرارا

الشاعر المعروف مطلق بن فيحان الصوينع أحد خاصة الأمير نايف بن عبدالعزيز رحمه الله، والده فيحان بن بتاع الصوينع كان من المعاصرين للملك عبدالعزيز - طيب الله ثراه، ومن مرافقي سمو الأمير نايف - رحمه الله - منذ الصغر، وهو من الرجال المعروفين، كذلك من شعراء النظم والمحاورة البارزين في عصرهم.
يابوي جاكم علم وأنتم بعيدين
تحت اللحود اللي للأموات دارا
نايف توفى ثم لحق بالمقيمين
جاكم لبرزخكم طويل المسارا
جاكم وودعنا ثقيل الموازين
الحاكم العادل رفيع الوقارا
يابوي طول الوقت والناس باكين
الشعب يبكي ليلهم والنهارا
يابوي لو شفت القبر والمصلين
وشفت الدموع إللي سحابٍ اغزارا
تنزف ابدمعٍ جرّح الجفن والعين
على إجيوب الناس يابوي سارا
بكى على فقده ضمين الحرمين
وبكى على فقده إجبال وصحارى
وحتى البحر مدّه جزع صار مدّين
يلطم إخدود السيف فيه انزجارا
وبكى على فقده إرجال ميامين
وبكى على فقده إصغار وكبارا
وبكى على فقده بعيد وقريبين
ويبكى على فقده بسر وجهارا
وبكى على فقده إقصور ودواوين
وبكى على فقده إصحونٍ تبارى
وبكى على فقده إدلالٍ مع الصين
تفوح فالمجلس إبريح البهارا
وبكن عليه الامهات المحازين
وبكن عليه المترفات العذارا
وبكى على فقده حرار وشياهين
غابت اكفوف إللي يشيل الحرارا
يابوي لو شفت النساء ليل الاثنين
وكل السبوع إللي عقب ما توارى
إدموعهن تجرح افواد وشرايين
واصواتهن تكسر اقلوب الجبارا
واجفونهن حمرٍ من اكفوف اليدين
من كثر ما تسمح ادموعٍ تبارى
تحس في قلوب العذارى سكاكين
وتقول ولّع فالعبايات نارا
من كثر ما تسمع انحيب الحزينين
وحذف العباه وحذف كل الخمارا
الله وأكبر هز موته ملايين
فالحال خلاّهم أوقوف وحيارى
وهز الرجال اللي ازحول وقويين
اتشوف فيهم حالةٍ ماتدارى
يابوي جاك اللي يهز السلاطين
وكل الدول تعطيه كل اعتبارا
أنته اتعرفه زين من ماضي اسنين
ياما على كبر المهمات مارى
وياما قضى حاجات ناسٍ مساكين
حريص ما يبغى ابشعبه فقارى
وياما ومر باطلاق ناسٍ مساجين
العفو في نهجه وفكره اشعارا
يالله عسى قبره رياض وميادين
وفي جنة الفردوس عال القرارا
ومن حوض مبعوثك شراب الهنيين
وينعم بقربه في مقامه وجارا
الشاعر/ مطلق بن فيحان الصوينع