حاز الفخر حجمه وعرضه وطوله

لا والله اللي غاب حاكم ورجّال
هاك الزعيم اللي زعيم الرجوله
حاوي معانيها على كل الأفعال
وحاز الفخر حجمه وعرضه وطوله
ثالث ثلاثة من مشاهير الأبطال
من السبعه اللي كل أبوهم بطوله
راحوا وذكراهم مع كل الأجيال
تبقى على كل العصور محموله
من دوحةٍ فيها الأصل ثابت الحال
والفرع عالي والشعوب انحنوا له
ونايف فعوله مالها حصر وأمثال
ولو مات ما ماتت نتايج فعوله
نايف من الأمجاد من نشوته شال
ولا هزت متونه ثقيل الحموله
حكيم ومجرب وعارف وبذّال
ويعطي هل الحاجات لو ما عنوا له
حازم وجازم ما يراوي ولا مال
لا راحت الأرياء هزال وعذوله
يضرب برأي يهز له روس وجبال
من كلمته يعرف مداه ووصوله
وحليم في بعض المواقف والأحوال
ودايم على الاحسان نفسه مثوله
يا رب تجعل له بجنتك مدخال
في عالي الفردوس تجعل نزوله
واجبر عزا الأسرة وشعبه ومن قال
يا رب تغفر له وحسّن قبوله
واجعل عوضنا في حكيمين الأشبال
ما مات من خلّف خلافه زحوله
الشاعر/ مطلق بن فيحان الصوينع