شاعر وقصيدة

الشاعر جزا بن صالح الحربي شاعر معروف وله العديد من القصايد، شاعر عرف بقوة شعره وعذوبة معناه وجمال تصويره، من قصايده الجميلة ما يتذكر فيه مضارب البادية ويحاكي الأطلال ويصور معاناته وعشقه يقول:
أمس الضحى في عالي الرجم عديت
وفيضت في راسه عباير خفوقي
وقعت لين ادلولس الليل ومسيت
وحولت منه ناشفات عروقي
ورديت من بكره عليه وتعليت
وقعدت حتى شفت شمس الشروقي
أشرف على دار بها العام مريت
واليوم ماكنه سكنها مخلوقي
خليان ماكن ابتنى بارضها بيت
بس الفجوج الخاليه والطروقي
وحتى من الأوناس ما شفت ماريت
ما غير رسم باقي له رموقي
بس الشنون محذفات تشاتيت
شنونن على الديران مثل البهوقي
وشفنا الرسم اللي عليهن تشافيت
رسوم عليها القلب مني شفوقي
رسوم عليها من أزرق الدمع هليت
دمع تحدر فوق خدي صفوقي
ليا شفت مدهال الرجال الزناتيت
تقول قلبي ينمزع من عروقي
رجال مرابعهم تهيظك لاجيت
ومرباعهم بين الجلد والعروقي
ونجورهم للضيف ترسل تصاويت
وضيانهم بالليل مثل البروقي
رجال عليهم من قديم تربيت
وفارقتهم والقلب مني يتوقي
وابديت مافي داخل القلب واقضيت
وانساق من عمق الهواجيس سوقي
وأبكي عليهم كل ما صحبت وامسيت
وشكواي لله عالم الشان فوقي
وشعاد لو اني بكيت وتمنيت
ياما بكى قلبي حزين عشوقي
وقلبي بكى حي على غالي ميت
والدمع عقب في ضميره عشوقي
وياما بكى رجل عليه التثابيت
قبل الوقايع هل دمع حقوقي
ولو لامني بعض الخبول السرابيت
أهل النفاق مشدقين الحلوقي
بذني صقه عن حكيهم ماتوحيت
ولا أحب ناس لسرارير تبوقي
وان قالوا العذال وش فيك ما أبديت
ماني على أسرار الأوادم نطوقي
أمشي مع العام على ما توريت
أعطي حقوق الناس وأخذ حقوقي