تصبيحة العشب

صباح عيدك يا وطن تصبيحة العشب لنداه
تصبيحة الطير لفضاء حلمه ولاغصان الشجر
غنيت لك مثل أغنيات الناي في صدور الرعاة
اللي ليا فاضت بما فيها يلين لها الحجر
رملك على صدر الجزيرة مثل سجادة صلاة
يا طاهرة يا اللي بيوتك غيم وحدودك فجر
ما هانك الله رغم كونك شاسعة بحر وفلاة
ولا اغتصبك بطول تاريخك فرنج ولا غجر
الله حماك برحمته والا ترى اسراب الغزاة
مثل الجراد اللي ليا منك زجرته ما انزجر
ظليت أشبه بأمٍ اشقاها الضنى في ها الحياة
ما بين ظلم اللي بقي وما بين هم اللي هجر
لين الله ارسل لك من اطياف المدى حلم وعساه
تتحقق أحلامك على كفه وياخذ بك أجر
عبدالعزيز ومن مثل عبدالعزيز ومن سواه
ملا صدور أهله رضا وصدور عدوانه ضجر
في يوم عيدك يا وطن رتبت في صدري وفاه
العود جاوي والفجر يصحا على دنّة نجر
صباح عيدك يا وطن تصبيحة العشب لنداه
تصبيحة الطير لفضاء حلمه ولاغصان الشجر