أخ يا أم الرخا والشدة، ما شاء الله لا قوة إلا بالله.. طويييلة .. وماشية ورا البحر في كل لفة.. وهادي أول مشكلة.. لو إن الشوارع فاضية وعندك وقت، ما في مانع يا سيدي المشوار يطول حبتين. بس المشكلة إن العكس هوة إل صاير..البلد يتمدد بالطول ووسطها مليان أراضي بيضاء وفاضية، وأسعارها طبعاً "خزعبلية".. من فين يا حسرة!! ما إنتو عارفين البير وغطاه، أهل جدة هادي طاقتهم، وإلا الهدف مو إحنا؟!! والكلام لك يا جارة!!.. ما علينا.. والمواصلات العامة طبعاً دي نشوفها بس لما نسافر بلاد برة، ونكون بالمرة مبسوطين وإحنا راكبينها! لكن في بلاد جوة والله ما نقر بها.. وأنا أولكم.. معذورين لأننا كلنا عارفين وضع الباصات ومحطاتها. والنتيجة إن الشارع مثلاً يكون عرضه 20 متراً وطوله 200 متر وتتملي فيه أشكل من 400 سيارة.. وكل سيارة فيها بس واحد نفر! طبعا لازم تصير زحمة في كل مكان. ويا ويلك لو عندك بزورة في مدرسة..قدام بابها تلقى 300 سيارة، في كل سيارة نفرين دي المرة.. وتعصب على ولدك، وتحط حرك في إل سايق جنبك وقدامك، وتوصل بيتك تكمل الناقص.. ونرجع نقول من فين يجينا المرض وضيقة الخلق: زحمة وقلة صبر وكل واحد يا الله نفسي، ولا ومو بس كدة.. كمان العوادم دي إل عادمة البلد تلوث ليل ونهار.. ودكاترتنا احتاروا في أنواع الأمراض الصدرية إل شافوها في أولادنا.. حاتقوللي: والمردم؟ حا أقولك: هادا "كوم" تاني، ولو وقتك يسمح أشرح لك، بس إنت أدرى مني بحالتها.
