خواطر من فوق السحاب

هناء عصام
طول الوقت بقول ده مش وقت شارع و مظاهرات .. و كل اللى عنده مطالب ليها علاقة بمرتبات ولا احوال معيشية ولا مطالب سياسية ولا غيره فيه الف طريق شرعى غير الشارع ! و طبعا ده للناس اللى عندهم مطالب بجد مش اللى هدفهم ينزلوا يخربوا البلد و خلاص !! لكن اقسم بالله العظيم المظاهرة الوحيدة اللى ممكن تنزلنى الشارع تانى دلوقتى و رغم كل ظروف البلد هى مظاهره ضد سواقين النقل و التريلات و ضد كل المسؤولين عن حوادث الطريق !! الناس اللى بتموت و هى رايحة جامعة او مدرسة او شغل مش اقل من اللى بيموت ف كمين !! ده ف شغله و ده برضه كان رايح شغله !! و محدش يقولى ده ارهاب منظم و مقصود و حوادث الطرق مش ارهاب منظم !! سعادتك لما تسيب سواقين مبرشمين ولا مش نايمين 24 ساعة ولا مهملين ولا ولا ف وسط الناس يبقى ارهاب منظم ..ولما تسيب عربيات تمشى عكسى ولا تمشى بسرعة جنونية ولا تمشى من غير نور بدون اى عقاب يبقى ارهاب منظم .. و لما تسيب طرق ما يعلم بيها الا ربنا يبقى برضه ارهاب منظم !!
كلمنى اكتر عن رعبك و هلعك م القنبلة البدائية اللى بتتزرع و بتستهدف كام واحد ... و اهمالك و لامبالاتك و سايبانك لالف قنبلة موقوتة ع الطريق وبتستهدف ملايين ؟ كلها ارواح بتروح ..و كله ارهااااب !! اسفة جدا مفيش حاجة اسمها اولويات ف ارواح البنى ادمين !!!
فكر تانى !!
****************
كان هناك جلسة لتقييم أوضاع مصر قدام المجلس الدولي لحقوق الإنسان بجنيف !! وطبعا زى ما كلنا عارفين قد ايه مصر قاسية ووحشة و بتهدر حقوق الارهابيين لكن اللي حصل من أمريكا في العراق و الناتو في ليبيا وإسرائيل في غزه حلاوة بالقشطة !!
جو .. تو ....هل !!
***************
حلو انك تبقى مذيع عايز توصل للحقيقة و تحاسب المسؤول و تراقب الحكومة و تعمل سبق و تبقى بطل وصوت الناس ...لكن من الحماقة والغباء و قلة الادب انك تزعق و تصوت و تهين وتشوح و تخبط و تشرشح و تعتبر نفسك رئيس مجلس ادارة الدنيا !! يا حضرة الاعلامى يابو ميكروفون مش محتاجة افكر معاليك ان صوتك واصل لاااااااااااااخر بلاد الدنيا كده كده ........ليه بتعليه ؟
المهنة ف الضياااع !! و المهنية ف المهلبية !!
إعلامية بالتلفزيون المصري