قصيدة الشاعر مرير الحبيل

هذه قصيدة للشاعر مرير الحبيل العتيبي قالها عندما سأله أحدهم لماذا لا يكتب قصائد في الغزل :
نشدني صديق قال حبك و رى ما بان
ورى في الغزل ما لك بيوت مسويها
ولا لك غزل يالقرم بسم الله الرحمن
ورى كن ما تذكر هنوف مهاويها
و أنا أقول قلب ما يحب الهوى غلطان
و أبشرك و الله من هنوف مصافيها
و بأعلمك و أنت تعوذ من الشيطان
دام النشامى تستمعني بأذانيها
أنا حب لي حب تولع بها العربان
عيال النشامى اللي طوال يمانيها
أحب الرجولة و الرجولة لها سيسان
ترى ساسها لا طاب يرسي و يرسيها
و أحب الكرم و أهل الكرم و الكريم معان
كريم و نفسة للمواجيب مصخيها
و أحب أشتري عود أزرق من الدكان
و أطيب رجال سيرت لي و أقهويها
و أحب الدلال الصفر من صنعة الرسلان
إليا دارت المجلس و ما جوبها فيها
و أحب الحرار اللي لها فالعشى برهان
تقضض على جول الحباري و تدميها
و أحب الحصان اللي سبق و الحصان حصان
و أحب الذلول اللي تقدم براعيها
حسينت حلايا ما لها في الحلا لأثمان
خطات الأصيل إليا فرحت وجه قانيها
و أحب الجيوش إليا رزمت داخل الميدان
إليا قادها القايد و هرول يباريها
و أحب الصحاري خص لا شبعت الحيران
لا بكر الوسمي و زانت مراعيها
و أحب الحلال إليا أنتشر داخل الصمان
قطاعين ذود و المواتر بتاليها
و أحب البيوت اللي تظلل بها البدوان
عيال الجزيرة ساكنين براضيها
و أحب الخيال المد لهم لنهمر ودان
و أحب الفياض اللي تناسف علاويها
و أحب أمزع رجلي و أشرف على الجيران
و أمد النظر فاللي عسى المزن يسقيها
و أحب الجيوب اللي تمرهد مع الخليان
تعانق طيور الجو تمشي مماشيها
و أحب الرفيق اللي وقت الشدايد بان
رفيق الرفيق و رفقته ما يخليها
و أحب الخوي اللي تجي كلمته ميزان
وزن كلمته لأجل الرجاجيل تغليها
و أحب القصيد اللي يحكم على القيفان
و أحب الصفوف اليا أستوت قدم واليها
و أحب السوالف وآتسمع من الشيبان
أليا وردوها بيضت وجه راويها
و أحب المثايل لا ضربها مثل راكان
و أحب العلوم الطيبه و أفتخر فيها
و أحب القصير اللي يبين لك الصفطان
مثل جيره كل المخاليق تطريها
و هي قصرت محمد لا عدت الجيران
له قصره ما جالها اللي يحاليها
حياه المهادي للمفرج جمل زومان
زحول الرجال اللي بقى ذكر ماضيها
و أحب الهنوف اللي لها في الحشى مسكان
فتات على السنه عزاز موطيها
ستيره و لا تحرص على فتحت البيبان
و لا تلتفت للي يبي يلتفت فيها
و خير المناوي كلها طاعت الرحمن
لوا هني اللي صلاته مصليها