حياة البدو

حياة اليوم ما بيها .. ولا ني يا عرب شفقان
أنا عاشق حياة البدو.. والبدوان من ساسي
ياليت أقضي ربيع العمر .. بين النوق والحيران
مع البدوان أحب أقضي حياتي والفظ أنفاسي
أحب أتبع قطيع الزمل يوم تسرح القطعان
وأحب الثوب يوم يصير .. يابس من عرق راسي
أحب أمشي أحب أمرح أحب الورد بالريضان
أحب أذكر.. زمان راح قلبي ما بعد .. ناسي
وأحب أمشي ولو .. حافي واحب أصعد على الضلعان
وأشوف الروض متفتح وبيت الشعر.. به رأسي
واحب الما .. بالقلبان إذا حسيت أنا.. عطشان
أحب الدلو .. من ينزل أشوفه ينجلي ياسي
وسراج البيت يغريني إذا.. علق على العمدان
يجيب الساري بليله ليا .. صار البرد.. قاسي
واحب الفجر .. قبل الصبح وأسمع لجة الرعيان
صباح الخير .. يا دنياي يا شفي وهو جاسي
وأحب أن جيت في روض ومشيت بمرتع الغزلان
وعيني تتبع "حباره" نصاها .. طير .. قرناسي
وعلقها.. بمخلابه وهو .. خالي حشى جوعان
تقل ما كنه إلا "الزير" لا من شاف جساسي
وأنا .. لي هاجس مثل الوليف المخلص البطران
على ما تشتهي روحي يفيض ويمتلي كاسي
وابسقيها .. لعشاق القصيد .. وروعة القيفان
كتبت أبياتي وغنيتها.. ودقيت الإجراسي
ولاني بالشعر .. واقف مواقف نمر بن عدوان
مجر .. شي حسيته وهذا .. مجمل إحساسي
عيد الملاح - الرياض