مسلسل قبيلتنا

الشي اللي يخليك تحمد الله على العقل، هاللي تعرضه التليفزيونات بزعم انه شغل زين وله متابعين، مسلسلات ما تدري وش تبي ولا تدري اللي كاتبها وش يحس فيه، كل واحد لقى نفسه فاضي قام يكتب قصص على كيفه ومن مخه (اجل تبي يكتبها من ركبته)، لا شفت المسلسلات الثانية تعرف ان ما عندنا العين المفتحة او اللي عليها القيمة، ابد بس جب لك شخابيط وسمها مسلسل وحط فيها حريم كثير وتلاقي المنتجين السعوديين وراك ركض، كل هذا يهون عند المسلسلات اللي تسمي نفسها تاريخية او قصة تنغز في ناس وتنقص من قدر ناس معينة، بدت تدخل المسلسلات بشغل التزوير والنصب والاحتيال، واحد عنده وجهة نظر حولا ولازم غصب نصدق ان هذي الحقيقة، كل من معه قروش يجيب له كاتب سيناريو بكم قرش ويعطيه الخطوط الحمراء لزبرقة امور معينه هو يبيها وتشويه صورة ناس معينه هو ما يبيهم،عاد كاتب السيناريو زي الخياط، الثوب اللي تبيه يفصل لك ولا يناقش، اهم شي عنده القرنقش، كل ما تدفع زيادة يضبط وضع قبيلتكم ويخليها اطلق قبيلة بين القبايل والباقي ما عندك احد، المشكلة اللي بدت تطلع علينا مشكلة المسلسلات التاريخية اللي فيها شوي تزوير وزبرقة ناس على حساب ناس، الناس تقدم وتستفيد من تاريخها في تطورها وحنا نستفيد من تاريخنا عشان نلغي بعض، ودي اسوي مسلسل عن قبيلتنا امحط فيه كل القبايل واحط نفسي فارس القبيلة، بفلوسي وانا حر!