"البطي" ل"الدواعش": يا مدعين الدين.. يبيعكم من شراكم بأجرة حذاكم

قال بقصيدته النبطية: يا اللي تفننتوا بقتل المصلين.. اخسوا وعودوا وراكم

سطر الشاعر منصور البطي، قصيدةً نبطية، تستنكر الجرائم الإرهابية التي ينفذها تنظيم داعش؛ حيث نددت أبيات القصيدة بتلك الأعمال الإرهابية، واصفةً من يقومون بها بالشباب المغرر بهم، والذين استخدموا كأدوات من الحاقدين وأعداء الاسلام.

وقال "البطي" في أبيات قصيدته:

يا مدعين الدين!! اخسوا ترى الدين
بريء من إجرامكم وادّعاكم

إنتم عدو الدين.. أول وهالحين
اخسوا بأمر الله وعودوا وراكم

لا ما سلم منكم "صحابه" وأسمين
يشهد بها التاريخ راحت خطاكم

لو كان للتاريخ فمٍ ويدين؟
كان أرضكم تبلع سحابة سماكم

حنا تجي من وين او وين او وين؟!!
أعداءنا أنتم وحتى رفقاكم!

ناس تبي الإسلام يهجر؟! مساكين؟!!
روحوا وموتوا غيض واللي شراكم!

صرتوا مطية له وكل ما لها تبين
صدقانكم منهم؟! وحنا أعداكم؟!

ياللي تفننتوا بقتل المصلين!!
إسلامنا ليته سلم من أذاكم

غررتوا بعقول الشباب المولين
جبتوا لهم قتل أهلهم من طغاكم!

انتم سهام أعداءنا والحقودين
ناسٍ تدبركم وترسم معاكم

خطة محي الإسلام من عام ألفين!!
وقبلها بسنين دارت رحاكم

لكن ترى هيهات هذي على مين؟!!
والله أن يبطي البطا من بطاكم

باكر يموت الشر ما أقول بعدين
باكر تموت أحلامكم مع مناكم

باكر تبين الشمس وتفتح العين
اللي خدعها التيه وصارت معاكم

باكر يبين الصبح والغمة تبين
والليل تطبق ظلمته في مساكم

ويقلب عليكم من شراكم من سنين!
يبيعكم بأرخص من أجرة حذاكم!