شغلوا الأتاريك

انت جايب هادي الاتاريك والفتلات حقتها معاك ليه يا سيدي هيا الكهرباء حتنطفي والا ايه؟ وطي حسك واسكتي لا تسمعك شركة الكهرباء وتقوم تطفيها وانتي عارفه انه الجو هادي الايام في جده طبيييخ والاوادم في البلد حاطه يدها على قلبها وخايفه لا تنطفي الكهرباء بحق وحقيق .. طب قولي جايب هادي الاتاريك معاك ليه فهمني ؟ انا افهمك عشان ياستي ابغى اولع بعض الاحياء اللي محروومه من الاناره احياء في الجنوب واحياء في الشمال واحياء في الغرب والشرق محرومه من الاناره لها كم اسبوع والحبايب اللي انتي تعرفيهم ساكتين لا حس ولا خبر، يعني بالله عليكم فهموني ايش لزمه عواميد الاناره المرصوصه في الاحياء او حتى في الشوارع لكن في الليل ما بتشتغل سويتها للزينه مثلا مو هادي العواميد رصيتوها في الارصفه مو عشان تولع الشوارع والاحياء والحارات وبكده تعرف الناس تمشي في امان وبراحتها بدل ما تصكع في بعض من كتر الظلمه بعض الاحياء والحارات والشوارع الرئيسية صارت زي الكحل من كتر الظلمه اللي فيها والسكان اللي ساكنه في هادي الاحياء كل يوم والتاني وهما بيتصلوا ولا احد بيرد عليهم جاهم الهم والغم وان ردوا عليهم ما ياخدوا منهم الا الوعود احياء وشوارع وحارات مظلمه لو انقتل فيها قتيل محد دري عنه او اذا حصلت سرقه في البيوت حنمسك مين ونخلي مين وانتو عارفين وشايفين كتر السرقات اللي بتحصل في بعض الاحياء فين الحبايب حقون صيانه الاناره اللي ساكتين على الحكاية دي قلبهم ما يوجعهم وهما شايفين هادي الاحياء مظلمه بالشكل ده، وفين الحبايب حقون متابعة الشوارع ساكتين على الحكاية دي ليه كده بس عشان كده بقول ياحبايب يامسؤولي الاناره تابعوا الاحياء المظلمه وانتبهوا لصيانة الشوارع وارحموا من في الارض يرحمكم من في السماء وعيشوا كتيييير تشوفوا كتييييير.