نقطة العسكري

إيش دا الزحام يا سيدي حتخلص الغمرة حق الاوادم وأنا لسة ما وصلت؟ ، يعني ايش تبغيني أسوي أقعد أزعق زي ونان الإسعاف عشان يفتحولي الطريق هادي جدة وهدا حال الشوارع والتقاطعات فيها، ونظام الثواني حق الاشارات لاعب في التقاطعات لعب يادوب كم سيارة تمشي وتنقفل الاشارة واستنى يا مليح 190 ثانية عشان تفتح الاشارة تاني وإذا خضرت الاشارة تلاقيها على 30 ثانية في بعض التقاطعات، 30 ثانية ايش تكفي عشان تمشي آلاف السيارات في التقاطعات؟ الناس صارت تتأخر عن أعمالها ومدارسها ومشاويرها وكله من تحت راس هادي التقاطعات، كبرت جدة وكترت شوارعها وسياراتها وما عاد صرنا نشوف العسكري ولا حتى دبابوو لا عند إشارة ولا في أي شارع لانه عم ساهر شعترهم شعترة وما عاد صار فيه نظام في الشوارع والشوارع صارت حايصة لايصة والمشوار اللي تبغى تاخدو في ربع ساعة يبغالو ساعة زمان، أغلب التقاطعات صارت السيارات تتشبك فيها تشبيك خاصة في منطقة البلد تقاطع باب شريف وتقاطع (ك 2) وتقاطع سوق اليمامة سواء الشارع الطالع أو النازل هدا غير انه اصحاب سيارات الكدادة اللي بيحملوا على مكة لاعبين في حسبة الشارع لعب، آآآآآه الله يرحم أيام زمان، أيام ما كنا نشوف رجل المرور واللي كنا نسميه على زماننا العسكري تلاقيه واقف عند الاشارات واللي كانوا يسموها نقطة العسكري تلاقي العسكري واقف في الشارع أو فوق البرج الصغير اللي كان موجود عند كل تقاطع واللي بيسموه الحبايب نقطة العسكري بس أنا أذكر انه له اسم غير كدا وتلاقيه ينظم حركة السير بيدو أو بصوت الصفيرة اللي كانت ما تفارقهم وينظم الحركة وكانوا ماسكين في يدهم دفتر المخالفات واللي كانوا يسموه في داك الوقت (قلم المرور) رغم انه في داك الوقت كانت السيارات في جدة قليلة لكن كنت تشوفهم في الشوارع وعند الاشارات ينظموا حركة السير ويكتبوا المخالفات وياسلام على مخالفات زمان السير بدون توازن السير بدون نور خلفي. السير بنور واحد في الأمام. السير على الشمال. استعمال رقم (كاذب) بالسيارة. عدم وجود نمرة بالسيارة. السير بدون أن يكون حاملا رخصة السواقة معه. عدم الوقوف حين طلب الشرطة. عدم إسكات المنبه عند نفور الجمال محاولته تعدي إحدى السيارات في طريق ضيق. عدم إخبار مخافر الشرطة عن (السيارة التي صادفها معطلة). السماح لأحد بالركوب على (أجنحة) السيارة. نقل أشخاص أكثر من العدد المقرر. عشان كدا بقول لحبايبنا اللي في المرور دخيلكم لجل الله شوفوا حل لزحمة الشوارع وخاصة عند التقاطعات.
وعيشوا كتيييييير تشوفوا كتيييييير.
للتواصل أرسل sms إلى 88548 الاتصالات ,636250 موبايلي, 737701 زين تبدأ بالرمز 150 مسافة ثم الرسالة
abofatoo@hotmail.com