يا شامنا

يا شامنا جرحك أصاب الملايين
وهلت لها أمطار الجفون الغزيره
ألم صاب أقصى بلاد المسلمين
وزادت أفكار العزيزين حيره
من كل صوب نشوف دم العزيزين
يراق وعيون الخلايق ضريره
الين صار أنهار تروي البساتين
ونبت زروع الذل في كل ديره
يا خادم البيتين يا ناصر الدين
يالقائد الاعلا لجيش الجزيره
يا حامي الاسلام بالعسر واللين
يا طيب الذكر ونقي السريره
تكفى يا بو متعب تحث الكريمين
للخير واغاثة نفوس كثيره
صوت اليتامى والشيوخ المسنين
ينخاك وآمال الأرامل كبيرة
الدين صاح ولا حصل له ملبين
إلا أنت لجله سقت نفس مغيره
أقدم وخلفك شعب كله محبين
لجلك يخوضون البحار الخطيرة
رد الأمان لشعب في خوفه اسنين
وحنا لك ادروع وحزام وذخيره
أحي الأمل واعدل كفوف الموازين
يا شامخ له طيب الافعال سيره
درعا وحمص تجدد العهد لجنين
ومسلسل التغريب جدد مسيره
وطير السلام أصبح كسير الجناحين
وزيتونة الشام الابيه كسيره
والأمن تايه ما لقى له عناوين
والعدل مات وقل بالأرض خيره
والمسجد المهجور نادى المصلين
وأركان الطاهر بالمصاحف منيرة
وصوت المؤذن تخنقه عبرة العين
ينظر لساحات الديار الحسيرة
وانكار فعل الظلم ما له مضامين
وصمت العرب ماغيرك أحد يثيره
صلاح يوم انه توجه لحطين
قاد الجيوش ولا تاخر مسيره
وانت يا بو متعب تحد المعادين
وتقص الفتن بسيوف حق وشطيره
عبدالعزيز بن عبدالله السريع (ينبع)