باقي الدنيا بخير

سعيد الأحمري :
أحمد يقول الدنيا خلاص ما فيها خير
سؤااااال لخبطني لمدة يومين
والسبب؛ في وادي الدواسر, شفنا حرمه كبيره في السن, طلعت من المحل و معها 3 عيال لبسهم وحالتهم ماااش, ركبت الحرمه ( مع باب السواق, وقبل تقفل الباب, طلعت المفتاح من جيبها, و دقت ريوس.... و دعست بالددسن الغمارتين و روحت على الخط السريع .. * أشهد إنها بنت رجال )
ليه بنت رجال؟!
لأنها ما حطت كف على كف, وقالت خلاااص
الرجا يا ناس في الصغار اللي معها
حلمها بكره يصيرون رجالها, وسندها, و عزها
حلم الضعيف, اللي يتمنى
حلم أم تبي تكبر و يخدمها صغارها اللي طلعت في حر الشمس,
و تحدت الدنيا لأجل
( تشتري لهم " كريك كراك )
باقي الدنيا بخير
يعني لو شفناها واقفة بالطريق معطله
صدقوني الكل بيفزع لها, لأنها أم عيال, و حيلتها ضعيفه
يعني لو لقيناها تصيح
والله إن تطيح الشمغ وينتخي الرجال,
شهامة شعب تعود على الفزعه
يا ناس
باقي الدنيا بخير
تجي تصلي للفجر
هناك بالمسجد اللي بآخر الحاره
وتلاقي ( صغار ) يصلون هنا وهناك
تتأخر عن الدوام, تلاقي زملائك حولك
(الحمد لله على السلامه يا فلان)
تغيب يوم, تجيك الاتصالات ( عسى ما خلاف )
تكلم خويك ( تكفى يا فلان ) يطيح العقال من قوة الفزه
تسير على فلان, تلقى العود ( قبل لا تدخل البيت )
قد فاااح
وتشم الهيل قبل يوصل الفنجان فمك
تقول كلمه يسكت اللي عندك ماهو بخوف,
ولا معلومات نادره, لكن ذرابة رجال
تسكت شوي, يفز (خفوق) اللي بجنبك, يقول يا فلان ( إيش فيك )
قلوبنا بيضاء
و عاداتنا ما ماتت
تفرح ( إذا جاك واحد لبيتك )
ترحب وتسهل
و يمكن تتدين, بس تنام مرتاااح, ما فيه أحد جاائع,
بس نخوتك وشهامتك تبديها بكرمك
يا شباب
لو تصيح بنت السعوديه صدقوني, تجيبون عاليها واطيها, و لو ما قالت
( وا فلاناه )
ليه؟
لأن الدنيا باقي بخير
أدري
يحترق دمك لو سمعت عن أحد لعب بعقل بنت,
ودك تذبحه
أدري
يحترق دمك لو دريت إن ولد جاركم ما يصلي
أدري
يحترق دمك لو دريت إن خويك ناموا عياله بدون عشاء
لأن ما عنده, وينتظر الراتب
أدري
يحترق دمك لو دريت إن خويك صار له مشكله
ما وقفت معه..
الدنيا باقي بخير
تروح لصلاة الجمعه, تلقى الناس كلها ( كااااشخه )
ماهو عشان يقابلون الملك, بس الدنيا باقي بخير,
يعرفون إن اليوم عيد, وأعظم أيام الله
يجي رمضان
حتى الصغار, ودهم يصومون
ويقلدون الكبار
يجلسون على السفره, ويتحرون الآذان
ويسوون مثلكم
لا ويصلون التراويح, ويصلون التهجد
وتشوفهم ماسكين المصاحف, ويحاولون يختمون القرآن
لأن الدنيا باقي بخير
بس تدرون وين المشكله؟!
نطالع للأمور السلبيه, ونزعل عليها, ونكبرها,
ونزعج العالم فيها
ونشوف الأمور العاديه ونقول لااااااا ونفتح على
أنفسنا أمور نحن في غنى عنها
ما عندي شيء
إلا ( أتفلسف شوي )
أتمنى أن تليق بكم
والسبب
الدنيا باقي بخير