عيال اليوم

تقول العرب لازم تقدر كبير القوم
وتعطيه مقداره على قد مقداره
واذا هي كذا ولا كذا مانته بملزوم
تزكّي نفوس الخلق والنفس امّاره
ولدنا بليا هدوم وندفن بليا هدوم
وكلٍ يبي يُسأل عن يمين ويساره
تراها عناوين الرسايل لكلب الروم
تبين لك ان الحق قوتْه جباره
ترى الامس يبقى امس وحنا عيال اليوم
لكن الوكاد الوقت ماضيّه خساره
على قد ما تخطي يجيك العتب واللوم
لكن الحكيم يراجع بسرعة أفكاره
لا تحسب دوام الحال مهما يدوم يدوم
ترى الحال متبدل ودنياك دواره
مصيبة تحس انك بعدها محال تقوم
ومصيبة تعلمك الخوي كيف تختاره
تغير ظروف الوقت وتنسخ سلوم سلوم
ولا يصنع المزمار الا لزماره
هجوسي مثل عاطل اذا الكل غشاه النوم
يروح ويجي ويروح ويمتّر الحاره
على ما هداك الله توجه اذا منجوم
وبعض الخطا في الدين تلزمْه كفّاره
على حد علمك علم السائلين علوم
وأبو كار لا تحاول تجادله في كاره