اللغز

كان كاتب اللغز الماضي الشاعر هايس بن سريحان الحربي من القصيم والذي يقول:
من حل لغزي ياطويلين الاعمار
وين الشباب اللي يثبت يمومه
عن ضيف اقشر غالب راعي الدار
للدار جاء غصب بليا عزومه
دخل بها وخلاه ضايق ومحتار
ينام بفراشه ويلبس هدومه
للسطح يظهر ويتوارى للانظار
واحيان تبقى يارفيقي رسومه
وقد توصل للحل شعرا:
قريت لغزٍ من بديعات الأشعار
وابر معه واجيب خافي علومه
الشيب يغزي الناس في كل الأقطار
واللي يبي يصبغه ما احدٍ يلومه
احمد بن ناصر المحرج - الرياض
الشيب للشيبان حشمه ومقدار
كم واحدن يفرح بشوفت قدومه
مهوب لا يقصر ولا يطول اعمار
كلن على ما قيل مكتوب يومه
لا تصبغه وتقولي بعض الاعذار
كفى نعومه ماتدوم النعومه
سعد صنهات السهلي - الدرعية
سلام يا هايس تحية ومقدار
الشاعر اللي طيبات سلومه
الشيب حل اللغز والوقت يندار
هذا نظر فكري وهذي علومه
علي رشيد الرشيد - رياض الخبراء
يالله يا عالم خفيات الأسرار
هون علي الحل واعرف علومه
الشيب حل اللغز مانيب محتار
واللي بذل جهده فلا احدن يلومه
محمد أبودحيم - البدائع
الحل لي واضح ولو صار ما صار
هايس بن سريحان بانت عزومه
راع الكرم والطيب والبن وبهار
والشيب للشيبان حقق حلومه
فالح غازي الحربي-رياض الخبراء
دورت لغزك مع ثمانين دوار
واللي يجيب الجهد محد يلومه
الشيب حل اللغز يا واف الأشبار
وليا طلع بالعود ضعفت عزومه
حبيب فريح الشامي-البدائع
قريت لغز بالجريده به أسرار
من شاعر يبدع وبانت وسومه
ما ودنا بالشيب لو هو لنا ثار
من جاه وقته ما تأخر بيومه
طلال الرشيد- الجبيل