تخاريف ابو العريف

@ @ أبو العريف مبارك عليك شهر الصيام.
هذا أنت قلتها شهر الصيام, لذلك خلينا بعيدين عن الحش حتى لا ينجرح صيامنا.
@ @ لا هالأسبوع ابو العريف طيب وما دام الصيام يخليك طيبا عسى كل أيامك صيام عن الحش في خلق الله.
أنا طيب من قبل رمضان بس الناس ظالمين, تصدق ان هالزاوية كلفتني ذبيحة ب750 ريالا من أجل مرضاة بعض الناس, والحكم جاء من الدكتور اللي جالس هالأيام يكتب عن السكري الله يسامحه احنا ما سلمنا من قلمه الأحمر اللي يشيل نصف الكلام في هالزاوية طلع فيها بحقوق على (ثقيل)!!
@ @ الحمد لله اللي جا واحد يكسر رأسك مثل ما أنت مكسر رؤوس بعض الناس الله يخليه هالدكتور وعساه على القوة.
لا تخاف عليه دايم جايب العيد فينا.
@ @ إلا بسألك يابو العريف العجلاني سواها مع الطائي فاز على الهلال والقادسية؟
للأسف أنت تسأل قبل مباراة الطائي مع الخليج, لذلك الجواب في مثل هالحالات مجازفة, ونتيجة البارحة سأعلق عليها الأسبوع المقبل!!
@ @ ابو العريف التحكيم هالموسم (رايح وطي).
البركة في دورة التشيك جابت العيد في الحكام..!!
@ @ الله يهديهم في مباراة (فضيحة) وصاروا يخافون من كل المباريات لكن بسألك عن المهنا (وينه).
ابو عبدالعزيز اعتزل التحكيم المحلي وتفرغ لمباريات دولية, والله عرف لها المهنا..!!
@ @ خلينا يالفاهم من كرة القدم وخلنا نعرج على دوري اليد, يقولون هالسنة ساخن جدا؟
أبو (طه) في القاديسة يعني هالموسم بطولة لبني قادس, ومباراة الاحد بين القادسية والخليج بنشوف الدموع أربع أربع للخلجاويين, لا مهندس ولا مدفعجي ولا حتى الليزر اللي (معورين رأسنا) به هالخلجاويون حتى لو جابوا اسطورتهم (القادسية) فايز فايز, خذها مني وأنا أبو التعاريف..!!
@ @ واذا فاز الخليج؟
البركة في التحكيم..!!
@ @ يعني يابو العريف ممكن يرجع ليزر الخليج؟
والله شوف القضية مرتبطة بحل قضية الشرق الأوسط.
واذا شافوا حل لفلسطين ممكن (تنحل) قضية الليزر مع ناديه..!!
@ @ والله مافهمت شيء يابو العريف؟
ولا أنا لكن رمضان كريم, ممكن يعملون جلسة صلح وفيه سحور وحمص دسم للصحفي ابو الفتن وتنحل المسألة!!