المساء قنديل

الجرح هذا المسا قنديل
....عامين ما اضوى بقنديله
هو فرح هو زعفران وهيل
....واعز ضيفان ها الليلة
يا مرحبا والحلوق تشيل
....ما اقسى غيابك وتطويله
يا مزنة الوجن والمنديل
....يا كسر قلبي وتنكيله
اهلين من شانك التهليل
....والعلقم اجمع فناجيله
ترحيبة مثل عد السيل
....من بارق عينك تخيله
اسرجت لك من عتاق الخيل
....كحيلة تتبع كحيله
تجيب لك من لذيذ القيل
....والشعر تاطا مجاهيله
ولك شمعدان القلوب يسيل
....والشرق تضحك مداهيله
ماني بدمعي عليك بخيل
....لو كان لي بالصبر حيله
تستاهل المدح والتبجيل
....انزلت اسمى منازيله
ممنون لولاك عشت بويل
....ولا عرفت ابرع الغيله
خليتني للزمن ما ميل
....واضحك من اكبر غرابيله
زر خاطري لانطفى القنديل
....والهم جا واردفت خيله
ما دمت ذكرى مليك الجيل
....وما دمت انا اعظم مقاتيل