(( سلطانة الليل )) للشاعرنجيب الهاجري

يا سايق الفنجال زود بها هيل
ليلي طويل ولازمٍ لي أفيقه
أرقب ضيوفٍ قدرهم عالي ٍحيل
واشوف بارقهم بدالي بريقه
يا مرحبا بالليل واللي مع الليل
من قلب عاشق ينتظر له عشيقه
ترحيبة البدوان لا عرض السيل
واروى بلادٍ كل ابوها محيقه
عديت ليلي واقتنيت القناديل
ولو نورك كافي ٍ ما يعيقه
وصبيت لك من ساس حبي فناجيل
واهديت لك من غرس حبي حديقة
في كف يدك ناعمات المناديل
مديت يدي واعتزلت الخليقة
مالي عوض عنك ولا منك تبديل
ولا لي بدونك سكة ٍ او طريقه
سلطانةٍ في وصفها يتعب القيل
وتحير عقل اللي يبون الحقيقة
من عينها عفت العيون المكاحيل
ومن خدها عفت الخدود الحريقة
وفي ثغرها عقد وكرز والبلا ويل
شهدٍ عسل ويل النحل من رحيقه
في ميلها مالت بلادٍ وانا أميل
وتهون فيها كل دولة عريقة
اليا دعت لبيت واسرجت لي خيل
وسويت كل اللي تبيه بدقيقة
في ذمتي في ذمتي ما بقى حيل
تبغى الحقيقة واستمع للحقيقة
يا مرحبا بالليل واللي مع الليل
باللي لفتني في دياري عشيقة
سلطانة ٍ في قربها يبعد الويل
وفي بعدها عشت وحياتي حريقة