صوت الصورة

يا حي هذا الشوف نار ومعاميل
ونشمِي عليْه من النشاما أوْسُومِه
ما هُو زمان العولمِه قال والقيل
والتايه اللي تايهاتٍ عْلومِه
يالايمي فكّر وطالع بهَالجيل
قولة هلا للضيْف شِبْه مْعدُومِه
فهد عقيل الطويان - بريدة
العود دنّق على المحماس
شكله على البن ولهاني
من زود مابه صلاه عماس
له عام ماشف فنجاني
يا عود اربط جنوب الرأس
واسرع ترى جاك ضيفاني
عبدالكريم النغيمشي- لوذه
الله على وقت المطانيخ الأخيار
في ما مضى يوم النوايا سليمه
كلٍ بنجره يزعج الصوت للجار
في وسط قفرٍ والسماء وبل غيمه
والبن ريحه يوم زله على بهار
يجلا الهموم الكايدات العظيمه
مبعد عن اللي فالمدينه بدينار
والله يا فرقاهم رصيد وغنيمه
محمد زايد الحزيمي
يا حامس القهوة على صالي النار
يا زين جلستكم عساها هنيّه
رمز الكرم والطيب يا صاحب الدار
دلال وقهاوي وجنبها النار حيّه
عساك سالم صب بنًّ مع بهار
فلّ الحجاج وأدع رب البريّه
عثمان إبراهيم الرشيد - الرياض
النار شبّت للدلال المحاديب
وتصاوت الجيران تسمع ونسها
الشايب اللي لحيته نصها شيب
إما يدق البن .. ولا حمسها
قد جرّب الدنيا على الخبث والطيب
وكل العلوم الطيّبه قد درسها
شجعان سعود المقاطي - الرياض
يا حامسٍ بنّك على واهج النار
بالك تحرقه يا نجيب الكريمين
خلّه على فرز الجمر والجمر حار
حتى يطيب الكيف ويصير كيفين
وجهّز دﻻلك ﻻتعنوك خطار
الضيف حقه واجبٍ يا فهيمين
حمد عبدالله الوايلي - حوطة سدير
حييت يا عود تفيد الجمايل
وتسلم يمين تحمس البن حمسي
اليوم بين الناس مثلك قلايل
ما عاد كيف ولا مناديكم أمسي
ما غير ايفون والحال مايل
وكيفه الماخوذ كولا وببسي
علي بن معاضة - الرياض
شبيت ناري يا جماعه لحالي
أبا تقهوى وكل مطرود ملحوق
وسويت فنجالٍ على شف بالي
يا هقوتي ما ذاقه من الناس مخلوق
ليت المسير يطرق الباب تالي
يلقى الكرم طلي معلق بمعلوق
خليف فهيد الحربي - الرياض
البن مشروبٍ ورمز العروبه
يحمس بمحماسٍ بخبره ومقياس
مابه على أهل الكيف أدنا صعوبه
طبٍ على الابدان ومعدل الراس
أحمد السمحان - الزلفي
الشايب اللي موقدن ناره إيقاد
يحمس من البن اليماني بمدّه
هذا فعلنا وارثينه عن أجداد
وفنجالنا للضيف دايم نمدّه
ما ورثونا بالضحى لعب ورقاد
حنا قرومٍ جاهزة مستعدّه
عبدالعزيز فهد الريس - الرياض
إحمس من الحب اليماني بمحماس
بركود قلّبها على نار ملّه
الكيف يحضّر لمن بغى كيفة الرأس
من طيبها ما يقنعه نص دلّه
تبغى شقارٍ خفف الحمس بقياس
وإياك والحرقان إحذر تزله
سعود عبدالعزيز الهزاع - نعام
صورة العدد السابق
لا ضاق صدرك والعرب نايميني
قرّب معاميلك وشب نارك
واشعم بضون فالغداري تبيني
واحمس قهاوي ثم ولّم بهارك
ثم دقها بالنجر دقٍ فطيني
ثم كبها في دلتك بأختيارك
عبدالله عثمان الضويان - الشعراء
ياما حلا الضو والمحماس
والقهوه اللي يقلّبها
فنجال منها يزيل إعماس
بدلاله اللي يقرّبها
شايب يحب الكرم والناس
بأموره اللي مرتّبها
عبدالكريم عبدالرحمن السلوم - القرائن
يا ويل قلبي وين هاذيك الايام
يوم العرب تتعب على دلة الكيف
يحوفها رجلٍ من الناس مقدام
يحمس لها الحبات من دون تكليف
خالد ناصر المخيمر - روضة سدير
القهوه اللي ما تسوى على النار
عند أهل الكيف تفقد طعمها
ونشوف وجه الخير يحمس على وجار
فوق نارٍ بستراحه شمعها
وان نظرت إيمين ولا نظرات إيسار
تسرك القهوه ومجمل لوازمها
هذا الذي إليه تشتاق مسيار
نشمي مع علوم النشامى فهمها
سعود عائش التميمي - القاهرة
يا رافعين البيت حول الذنايب
والبن الاخضر داخله تحمسونه
فنجال من حاف الدلال الربايب
الهيل ل كليب لا تحقرونه
حقٍ على الاحيين تكريم غايب
تحت الثرى كل العرب يعرفونه
بدر الحزيمي
نرحب بمشاركاتكم الشعرية وما تلتقطه عدساتكم من الصور الهادفة والطريفة..
على إيميل الخزامى:
rb-khozama@alriyadh.com
أو الفاكس رقم: 0114871070