عواكيس

* أخ معوكس انا محتار الحين من هو أفضل رئيس ناد في دوري "زين" الموسم الماضي؟
سفير الحلة - الخبراء
- أنت محتار حط نقطة وتصير مختار فلاتة!
* الاخ معكوس الهلاليون يتفقون على الجابر مديراً فنياً للفريق وجهازه المساعد برتغالي
وش رايك انت في سامي يستحق الثقة؟
متعب صويان
-اذا مايستحق ابوعبدالله اجل من اللي يستحق جعل فاله الآسيوية!
* الحبيب معوكس وش حكاية الاستغناء عن 42 مدربا واداريا في المنتخبات السعودية.. وين الخطط بعيدة الأجل.. متى تظهر؟
راشد الدوسري- الخبر
-الرقم ذكرني ببطولة بعض الفرق اللي نصها قريقعان!
* الكثير من قضايا العالم انتهت إلا قضية رئاسة نادي القادسية.. ترى ماهو السبب يامعوكس؟
عبدالله التميمي- الرياض
- يدورن على القدر والملاس وما حصولهم!
* الصديق العزيز معوكس وش قصد صالح النعيمة يوم يقول ان لاعبي الهلال مثل ابناء الاثرياء؟
فهد الدهمشي- تبوك
-قصده نصف العريجاء ومطاعم المندي لهم!
* الناقد الكبير معوكس هل سنشاهد ناصر الجوهر في النصر وابراهيم تحسين في الشباب وفيصل البدين في الاتفاق وبقية المدربين في انديتهم .. ام ان حكاية تقديم 1000 مدرب ستكون بلا نهاية؟
حمود العنزي- عرعر
-نهاية فيلم هندي!
* ليش يامعوكس ما اختاروك رئيسا للجنة الاعلامية في بطولة الصالات الرمضانية بالكويت.. على الاقل تكون قريباً من الفريق يمكن تصير رئيس (الفيفا) للصالات؟
يوسف الصالح - الرياض
-ماعندي خبرة في الدورات التنشيطية!
* الاعلامي المخضرم معوكس من اللي يدير الآخر.. رابطة الاندية او الاتحاد السعودي؟ صراحة احترنا من الرئيس على الآخر؟
سعد القحطاني- ابها
-كلهم يدورون بوش!
* صديق الوسط الرياضي معوكس كم اسعدنا علي كميخ بالذهاب للخارج مدربا وعقبال مايعود مدربا للنصر؟
ناصر العوفي- المدينة
-ماعندهم شاغر إلا وظيفة معيض!
* هل تتكرم يامعوكس وتقدم لنا قراءة متوازنة ومفهومة لبرنامج المسحل يوم كان مديرا للمنتخبات واحمد عيد بعدما تولى رئاسة اتحاد الكرة؟
خالد أحمد- جدة
-واحد برمج والثاني عطله بفيروس!
* ماذا تتوقع للكرة السعودية خلال المرحلة المقبلة؟ .. صراحة انا اعتبر الزمن الحالي زمن طفرة النقاد؟
خالد الهاجري- الدمام
- مكانك سر لاتعلم به أحد!
* ماهو تفسيرك يامعوكس لضم من يردد عن النادي المنافس عبارة (اعزكم الله).. ومن الذي اتخذ القرار وماذا تتوقع؟
محمد الشراري - الجوف
-اتوقع أن اللي أعتمده مثل الاطرش في الزفة!
*صاحب المليون رسالة ابو العواكيس وش دعوى ياصديقي مطنشنا نرسل ورسائلنا شكل مصيرها سلة المهملات ياأخي كان زعلان والله نراضيك تراك عزيز وغالي؟
حمد الدوسري-ابومبارك-حي العزيزية
-لا بالله لا انا عزيز ولاغالي سمني رادوي!
*قاهرهم وحابس دمهم ابو العواكيس ماهو الفرق بين حضور الاداري المطرود لمباريات فريقه احس انه شراره حضر وخسر الفريق وغاب وحقق بطولة
نواف الصيخان-حي الفلاح
-الفرق أربعة شلوا الجمل والجمل ماشلهم!
*الغالي معوكس تتوقع بعد توقيع النصر مع يحيى الشهري بمبلغ كبير يمر الموضوع مرور الكرام عند محمد السهلاوي وابراهيم غالب خصوصا انهم قربوا يدخلون الفترة الحرة (الاشهر الستة )
أحمد الحمد- بريدة
-اما مرور الكرام كثر منها شكل الدعوى إشارات حمراء وساهر!
مع تحيات معوكس وسلامتكم
للتواصل مع معوكس
البريد الالكتروني sport@alriyadh.com
فاكس 48701070