اللغز

كان كاتب لغز الاسبوع الماضي الشاعر راضي على المطرفي من الخرج والذي يقول :
ياويش ميت ينقله واحد حي
في مشية الحي تسمع الميت يصيح
نفعه مع البدوان والحضر لا شي
وقت مضى واجد وبالحاضر اشحيح
وقد توصل للحل شعرا:
حييت يا راضي وموضوعكم شي
ذكرتنا دور البداه المصاليح
ذاك الجرس مطوي على شاتها طي
وعساه يبقى برقبتها ولا يطيح
عوض لافي الرشيدي - حفر الباطن
نحل السؤال وثم نعطيه راضي
ويبشر بحل مااظن فيه تصحيح
انكان تنشد عنه فابشر بحلي
ذاك الجرس بارقاب ذود المصاليح
مدعث عيد العبيدي - الرين
حييت ياراضي عدد ماهطل مي
واعداد ماهبت على المملكة ريح
ياصلك حل اللغز في الحال ياخي
جرس يعلق في الغنم مع سواريح
احمد بن ناصر المحرج/الرياض
يوم البداوة كانت الناس ياخى
تشد و تنزل مابهم واحد مريح
حلالهم يحتاج مرياع به شيء
صوت الجرس لاروح اولهم يصيح
خليف الحربي / الرياض
يا مرحبا ترحيبت الطيب يا خي
تنساق لرجال ٍ كراما ً طحاطيح
والحل في المرياع ل سار توحي
صوت الجرس يتبعْه ضان ٍ مساريح
مقرن بن متعب الهرف- الرياض
يالمطرفي لغزك على البال يا خيْ
لحظة قريته رمعتي دون تلميح
هذا الجرس دندن على فجة الضي
لا مدّت الرعيان ينوح ويصيح
حمود العبيد النورة/الرياض
يا مرحبا خذ حل لغزك وكاشي ..
. ان كان ماهو صح تعطين توضيح
هذا جرس للضان ماهو لحاشي ..
. بين الغنم ينبه لراعيه ويصيح
حبيب بن فريح الشامي - البدائع
اللغز حله ياهل العرف عنديْ
وباذن الولي يابو علي حلي اصحيح
والضان يسرح من مراحي ويضويْ
وفيه الجرس يا صح تسمع له اضبيح
هادي عوض الحربي- قبة
قلنا الجرس يقنب تقل مونسن شي
يرفع بصوته خايفن يمكن يطيح
رمعاتنا تصيب وأحيان تخطي
ولغز يوجدله رموز ومفاتيح
سعد بن صنهات السهلي الدرعية
راضي هلا بك عد مالاح لك ضي
يامن كتبت اللغز جاء فيه تلميح
اللغز حله عندي أسهل من المي
هذا جرس مرياع هو جاك تصريح
راشد الشقيق / القصيم
يالمطرفي لغزك عرفناه ياخي
الحل ياصلك تحت أسمي صريح
جرس يعلق بالغنم تروح وتجي
يالله عسى حلي وصل للمفاليح
قاسم بن محمد الداود من الدمام
من روضة الهباس قال الوبيري
حل الجرس ياهل الوجيه المفاليح
مع البدو والحضر موجود باقي
مع الغنم والمدرسه دايم يصيح
عويّد نهار الوبيري/روضة هبّاس
يالمطرفي لغزك وانا جالس بفي
ابرمعه بدون شرحٍ وتلميح
جرس بمرياع الغنم يطرب الحي
بمسراحها والا ليا جت مراويح
عبدالكريم الراشد التميمي - الغزالة.
ذكرتنا يالمطرفي مارد المي
وذكرتنا بصوت الجرس والمصاليح
لاوالله الا راح واقفى مع الحي
وصوته مع المرياع في فيضة الشيح
شلاش بلال العنزي-الرياض
وعلى وزن اخر
لغزكم يالخزامى صار عندي جليَّ ..
.. فالسلام عليكم مع جواب صحيح
جرسٍ معلقينه في رقبة طلي ..
.. ربطته محكمة مستحيل ايطيح
عبداللطيف الحمياني / عنيزة
كما حله نثراً:
عبدالله فرحان الهبداني
لغز الاسبوع
كتبه للصفحة الشاعرعبيدالله فالح الحربي-من عنيزة ويقول :
وش هم ثلاث اعيال والرابعة بنت
متشاركين بينهم في عملهم
الكل منهم عكس الاخر اذا امعنت
متجاورين ولا تدور بدلهم
نستقبل الحلول عبر الايميل :
rb-khozama@alriyadh.com
أو الفاكس : 0114871070
كما نرحب بطرح الألغاز الجيدة
نظراً لازدواجية المشاركات في زاويتي (صوت الصورة واللغز) نعتذر عن نشر الأسماء المتكرره في الزاويتين..