ياالله عسى الجنة منازل عظامه

قصيدة رثاء في امير الخطامة السابق محمد المغامس رحمه الله:
مرحوم يا شيخ بلحظه فقدناه
أميرنا السابق أمير الخطامه
كلن بكى الطيب وحنا بكيناه
ولالوم من يبكي ولا له ملامه
انهد ركن الطيب وشلون ننساه
فيه الكرم والدين وفيه الشهامه
منصى الضيوف والمعاميل مركاه
للضيف ماجوبه بحب وكرامه
اهتز وادي سدير وهزت قراياه
وهز المجزل موتته والثمامه
هذي الخطامه مسقط الراس تنعاه
وجبالها والحي خيم ظلامه
أميرنا الراحل كثير مزاياه
ركن البلد والطيب ذروة سنامه
فيه الحمية والوفاء من سجاباه
الله وهبه الحلم فوق العلامه
نخوه وفزعه وكل من جا ينخاه
ما قال تم موَّفق في كلامه
ما قدر الله كان والحمد لله
ولا من الموت المقدر سلامه
هذا الأجل كتوب وتقدير مولاه
والحي لا بده يثور اكتامه
يقوله اللي حست الجار فرقاه
خبر وفاة الشيخ هزت عظامه
عزاي للوردي على شد بلواه
موت الشقيق للي رفيع مقامه
عزاي للي ساكن وسط مبناه
وابو محمد والعضيد وعمامه
أنت خلف من راح ممشاك ممشاه
ياأميرنا نور البلد يا وسامه
ياالله يالمطلوب لا تحجب دعاه
من كل مسلم في صلاة وصيامه
يا رب اغفر له وكفر خطاياه
وياالله عسى الجنة منازل عظامه
ويوم الحشر ياخذ كتابه بيمناه
وبرحمتك تنجيه يوم القيامه
عسى على قبره شآبيب رحماه
في روضة خضراء عليه الغمامه
عبدالله بن حمد الغيامة