اللغز

الأسبوع الماضي كان لغز الأسبوع من طرح الشاعر ساير فالح الحنيني من الخرج والذي يقول:
رجلن ليامن ضاق قام يتعبر
يسمع صياحه كل من كان حوله
باسباب بنت نشفت دم الاقشر
وعزي لحاله كانهم مافزعوله
ووصلت للصفحة حلول الشعراء
ياصلك ياساير سلام(ن) معطر
عبر الخزامى طيبات نقوله
ضمنت انا الابيات حل(ن) مسطر
هذاك هو المفواح بريق وزوله
فزاع الشمري - حائل
ياسايرالفالح عساءلله يستر
قلته وغيري ياملا من يقوله
ابريقً ابيض قلت مهوب الحمر
ركب علي نارالغضاء من يطوله
سعد صنهات السهلي الدرعيه
يا مرحبا واللغز ما هو مشفر
نرسل وتقرى بالجريدة حلوله
زان البراد وزهبوا عزبة البر
والقدر كاتم طابخينه بكوله
صلاح بن عبدالله اليابس - رحيمة
ابريق فوق النار قام يتضجر
تسمع صياحه لو منته بحوله
واليا طفيت النار صوته تسكر
هذا جواب اللغز عرضه وطوله
محمد ابودحيم - البدائع
ارسل سلام للحنيني مسطر
اللغز وافي والجميع اشهدوا له
الحل قدر الضغط لا جاء مسكر
كل يعرف النوع لا شاف زوله
علي رشيد الرشيد/ رياض الخبراء
يامرحبا اعداد من راح ومن مر
وما رفرفت اعلام في كل دولة
الحل يا ساير على اللغز سطر
قدر الضغط يوم المكاشيت حوله
صالح غازي الحربي - رياض الخبراء
كما أرسل الحل نثرا
ماجد رجا الشمري/جدة
عقلاء مثقال العبدلي
لغز الاسبوع
كتبه للصفحة عبدالله علي الحوشاني من الرياض ويقول:
شيء مع الانسان يعمل على طول
ليل ونهار ملازمه في حياته
ان زاد شغله او نقص صرت مشغول
تفعل له اسباب تجدد صفاته
نستقبل الحلول ويفضل الإرسال عبر الإيميل
rb-khozama@alriyadh.com
اوعلى الفاكس 014871070
ويسرنا مشاركتكم في طرح الالغاز الجديدة