ذود مواليف

ترى طراة الروح ذودا مواليف
ذوداً مغاتيراً وكله ابكارى
ليا سمعت الصايح وصوت الغطاريف
تمشي وراء القعده وتنسى الحوارى
دعج العيون مقوسات الغضاريف
سماح الخدود معكرشات الوبارى
مد الرقاب وكاملات التواصيف
طول المتون وهازعات الفقارى
جل العضود ودقها بالاطاريف
وفيها الاذاني فاهقاتاً اقصارى
طوال الرقاب ارقابها اصخف من السيف
تفوز باللكزز نهار المبارى
ليافكها الله من البلى والصواديف
ما ياخذ الاول ياكود الخيارى
ليا ساعفك حظك وجالك على الكيف
ترى طراة الروح هاك النهارى
تصلح لرجلاً ما يحسب المصاريف
كل المراجل متخذها شعارى
مرباعها الصمان تاصل الى السيف
ترعى من المكنان وعشب القرارى
ومصيافها واد الرشا باول الصيف
ومقياضها المشقوق هاك الديارى
يعجبك مسراح النياق المشاعيف
ليا فكوا المقهور هجت تبارى
يستاهل العفراء رجال المواقيف
اللي مراجلهم خذوها جهارى
ومشياً مع البل يارجال العواريف
يسوى البنوك ونايفات العمارى
واخير منها خمس الاوقات يامنيف
بعد الطواف وبعد رمي الجمارى
وزيارة الكعبة تطوع وتشريف
اخير من دنيا الفنا والدمارى
وتفوز بأرضا الله وحسن التصاريف
وماقدر المولى على البعد صارى