كلام من ذهب

من ما جرى ما يكهله بدع قافه
هذي وصاه للرجال العواريف
ما دونها ولا وراها مسافه
وصية ماخذة عنها مصاريف
مضمونها في حال حق الضيافه
الاجنبي لا تجهده بالمحاليف
واحذر عن الصده وكثر الكلافه
ان جيت مشتان وهو بالتصاديف
بالك تذل الا صحا لك مشافه
لين له الجانب وجد غير تعنيف
راعي الجميل اذكر جميله وكافه
واحذر من اللي ما بعد ضاف او ضيف
لياه في عرضك يدور كشافه
المال ما يجمع بكثر الحواريف
والجود ما هوب السبب في تلافه
الجود يرقيك العلا والمشاريف
والبخل يوصلك السفل والكسافه
وكثر التعب ما زاد رزق الخواطيف
تيسان وافاه البخت في غرافه
وطلب العلا ما هوب بزين السواليف
ولا بتسطير الحكي والدفافه
الا ببذل المال وارخاية السيف
والعلم والشيمه وكثر العفافه
ذا القول مشهود الاحيف ما عيف
البخل هو الذل بالرجل آفه
يا سامعي من قاصر الفهم وضعيف
نصيحه تشرى ولا هي حسافه
ان صرت امير بالك الظلم والحيف
انهض مع المظلوم واطلق كتافه
وميزان عدلك لا يجي فيه تطفيف
ما خاف من يرجي الإله ويخافه
وعلى الرفاقه لا يجي بك زعانيف
اصبر على زلة رفيقك ورافه
واسمح عن المعسر وجد للملاهيف
بالمال واجبرهم بهرج اللطافه
ما يقعد المنجوم كثر التواصيف
والمهتدي درب السعد في تحافه
من جاد جده زيد له بالمصاريف
والا تردى صار رزقه حذافه
اسعى لرزقي بالمشي والتواقيف
ارجي لعل الحظ تسمن عجافه
في نجد حول وتارة نزبن السِّيف
عن تاجر يدور فينا الحتافه
اصبر ولو ثوبي على الساق ورهيف
بالستر يا زينه ولو هو لفافه
خطو الولد يامال هز الغضاريف
بالعجز لاحقه الكتب في ظلافه
يمشي بذل وعيشة الرأس تكسيف
والبيض يسقنه من الماء عذافه
ما شاف شوفات العيال الغطاريف
للرزق يبذل همته واحترافه
يعذر الاطق الصفا بالمغاريف
بالبعد عن دار كثير اعيافه
ذا قول من يمشي بدنياه ومعيف
يقصر ويضفي من زمانه لحافه
قلته وانا مالي على الناس تصريف
انصح وسيفي مغمد في غلافه
الملك لله ما لنا فيه تصريف
افكر بليله والضحى واختلافه
الرزق عند محزم الغرس بالليف
جميع ما يخفى عن الناس شافه
صلاة ربي عد ذار العواصيف
على النبي ماحصى الملبي طوافه
إبراهيم بن جعيثن