كلام من ذهب

مما جرى ما يكهله بدع قافه
هذي وصاة للرجال العواريف
ما دونها ولا وراها مسافة
وصية ماخذت عنها مصاريف
مضمونها في حال حق الضيافة
الاجنبي لا تجهده بالمحاليف
واحذر عن الصدة وكثر الكلافة
ان جيت مشتان وهو بالتصاديف
بالك تذل الا صحا لك مشافه
ليّن له الجانب وجد غير تعنيف
راعي الجميل اذكر جميله وكافه
واحذر من اللي ما بعد ضاف أو ضيف
ليّاه في عرضك يدور كشافة
المال ما يجمع بكثر الحواريف
والجود ماهوب السبب في تلافه
الجود يرقيك العلا والمشاريف
والبخل يوصلك السفل والكسافة
وكثر التعب ما زاد رزق الخواطيف
تيسان وافاه البخت في غرافه
وطلب العلا ماهوب بزين السواليف
ولا بتسطير الحكي والدفافة
الا ببذل المال وارخاية السيف
والعلم والشيمة وكثر العفافة
ذا القول مشهود الاحيف ماعيف
البخل هو والذل بالرجل افة
يا سامعي من قاصر الفهم وضعيف
نصيحة تشرى ولا هي حسافة
ان صرت امير بالك الظلم والحيف
انهض مع المظلوم واطلق كتافه
وميزان عدلك لا يجي فيه تطفيف
ما خاف من يرجي الالاه ويخافه
وعلى الرفاقة لا يجي بك زعانيف
اصبر على زلة رفيقك ورافه
واسمح عن المعسر وجد للملاهيف
بالمال واجبرهم بهرج اللطافة
من جاد جِده زيد له بالمصاريف
والى تردى صار رزقه حذافة
أسعى لرزقي بالمشي والتواقيف
أرجي لعل الحظ تسمن عجافه
في نجد حول وتارة نزبن السِّيف
عن تاجر يدور فينا الحتافة
اصبر ولو ثوبي على الساق ورهيف
بالستر يا زينه ولو هو لفافة
خطو الولد يا مال هزل الغضاريف
بالعجز لاحقه الكِتَب في ظلافه
يمشي بذل وعيشة الراس تكسيف
والبيض يسقنه من الما عذافه
ما شاف شوفات العيال الغطاريف
للرزق يبذل همته واحترافه
يعذر إلى طق الصفا بالمغاريف
بالبعد عن دار كثير عيافه
ذا قول من يمشي بدنياه ومعيف
يقصر ويضفي من زمانه لحافه
قلته وانا مالي على الناس تصريف
انصح وسيفي مغمد في غلافه
الملك لله مالنا فيه تصريف
افكر بليله والضحى واختلافه
الرزق عند محزم الغرس بالليف
جميع ما يخفى عن الناس شافه
وصلاة ربي عد ذاري العواصيف
على النبي ما احصى الملبي طوافه
إبراهيم بن جعيثن