تبتسم لك بيض الأيام

مرحبا حييت ياللي بعد غيبه تعود
مرحبا واليوم هذا نعده يوم عيد
مرحبا بك عِد ما حن في المزن الرعود
وعد ما ناحت حمامه على خضر الجريد
رجعتك للدار يامير جعلك فالوجود
والله إنها الغيث والغيث يحيي كل بيد
يا عساك بخير يامير والصحة بزود
وتبتسم لك بيض الأيام والحظ السعيد
ومرحبا باللي معك في الهبوط وفي الصعود
العضيد اللي ينومس ليا قالوا عضيد
ما تخلى عنك سلمان حلاّل العقود
أشهد إنه يستحق المدايح والقصيد
فيصليٍ هيبته ترهب الخصم اللدود
ومزبن الخايف ليا جاه في اليوم الشديد
يا عيال اللي حكمها ووسع في الحدود
يدفعه قو العزيمه وهوماته بعيد
لين خلا دوحة المجد بين أمن وركود
وأصبحت دوله وفيها الدول قامت تشيد
وراية التوحيد رِفعت على راس العمود
واستتب الأمن والشعب كله مستفيد
وأنت يا سلطان في رجعتك تبهج كبود
والفرح في صدور شعبك يا بو خالد يزيد
أنت لك بندٍ من الطيب من بين البنود
ماله مجاري ولا له مع العالم نديد
كم فقيرٍ جاك معدوم مسكان ونقود
وصرت له ظلٍ وملجأ ليا اشتد الجليد
من لجا بك يابو خالد قعد يرقى سنود
يا رصيد اللي من الوقت ما عنده رصيد
أمدحك لو إن مدحك على الشاعر يكود
واكتب بيوت القصيده وأغيّرها واعيد
وآتصيّد بين الأمثال للقاف الشرود
واجتهد في حبكة البيت والمعنى الفريد
وقاودت لي بعد ما عاندت لرضاك قود
وجت على كيفي ولبستها ثوبٍ جديد
وجيت أقدمها هديه بمسك وريح عود
ودعوتي عند النهايه عسى عمرك مديد