هلا يا راعي الإنسان

الا يا هجوسي حضري طيب القيفان
وهاتي جزيل الشعر يكفيك تأجيله
حلات الشعر لا صار في خيرة الشجعان
يزين اللحن والقول والقاف والشيلة
يجي طيب المنطق ما يبخس الميزان
على اللي يفسر منطقه سهل تأويله
طلبت المعاني كلها تنزل الميدان
ولو غاب عني قاف مجبور أوصي له
وهلت هماليله من الغيث والأمزان
على فكر منهو يجلب الخلق تحليله
أنادي حمام الورق يشدي لي الألحان
ليا ذعذع النسناس زانه مواويله
يزين الشعر لا صار في سيدي سلطان
جميع المثايل فيه ما تقبل الميله
تناثر بيوته كنها اللؤلؤ والمرجان
على جودة المنتوج مضمون تسجيله
صدوق المثايل فيه قولن على برهان
ليا شافته في قمة المجد تومي له
تماري بفعلن صاملن يرضي الصدقان
ليا قاد نو الحرب شبت مفاتيله
تقول الوفا والجود في قايد الفرسان
كريم السبال اللي من العز تكميله
حليمن حكيمن لصعب المعضلة فهمان
ولا همه اللي لردى زاد تطبيله
أبو خالد اللي مدته تغني الفقران
جزيل العطايا مدته توفي الكيله
بعد طالت الغيبة وجا للحضور اشجان
نقدم ولاء ما يقدر الوقت تبديله
هلا مرحباً بك عد ما ينزل الهتان
من البارق اللي سامرن في دجى ليله
هلا مرحباً لك عد مزنن معه ربان
غزيرن ثقيلن ما توقف هماليله
هلا مرحباً ترحيب يا مكرم الضيفان
من أهل الكرم والجود تلفي مراسيله
هلا يا كريم الجود يا راعي الاحسان
هلا يا زبون اللي من الضيم يشكي له
هلا يا عضيد الحاكم ونايف وسلمان
عضيد لبو متعب تحبه وتلجي له
عيال الزعيم اللي جعل للوطن حدان
أبو تركي اللي كايد الحمل تركيله
جمع شمل شعبه لين صار الجميع اخوان
حرار الصقور اللي على الطيب تلفي له
سعود بن سعيد البقمي