اللغز

الأسبوع الماضي كان لغز الأسبوع من طرح الشاعر باني فايز السبيعي من الإحساء والذي يقول:
ويش ورع عمر روحه قصيره يالانام
في حياته يغلي أمه ويرفع قدرها
الضروس اثنا عشر نزع واحد من شمام
في بطن أمه نشا ولا رضع من صدرها
وقد توصل للحل شعراً:
ياخزامي لغزكم بان في الوقت التمام
وانتم ابدعتم بجمع اللغوز ونشرها
ورعكم وسط الغمارة يمين من الغلام
فحص دوري للمواتر ونأمن غدرها
حمد محمد العوفي
مرحبابك يالسبيعي عدد وبل الغمام
والنجوم الساطعة تنفرق من بدرها
من نجح بالفحص يمشى عدال وللأمام
يلصقون الرقم حتى يزيد بقدرها
علي رشيد الرشيد
مرحبا يا باني ودوك حلي بالتمام
وصفحة خزامي نتابع دواماً نشرها
استكر فحص المواتر يجدد كل عام
منظره بأعلى القزازة وعينك سرها
سلمان سعد العوفي - عنيزة
يالسبيعي لغزكم واضح قدم الأنام
في قزازة موترك لا أنتهى ياصبرها
أستكر للفحص والفحص دوري بالنظام
والسلامة مطلب للجميع بكبرها
صلاح بن عبدالله اليابس - رحيمه
لغزك اللى بالجريدة يجدد كل عام
الفحص الدوري سنة والشهور ونمرها
وانت سالم يالسبيعي وتسلم والسلام
خذ بوابي وانت يمناك يالله درها
محمد بن عبدالرحمن أبو دحيم
مرحبابك يالسبيعي هلابك يالغلام
لغزك اللى بالجريدة قرنيا سرها
استكر فحص يبونه علينا كل عام
دولة تامر علينا نطاوع أمرها
سليمان بن براهيم الفرحان
مرحبا بك يالسبيعي ولغزك صار هام
وحلها واضح لنا ماتخفى سرها
هذاك استكر للفحص وهو واضح تمام
والذي ماجدده لا لا يأمن شرها
محمد بن صالح الأطرش
كما توصل للحل نثراً: فهد الحزوم - حائل، العنود بنت مثل البراهيم - الرياض، ناشي خلف الروقي - الرياض، هلال ضيف الله المطيري - حفر الباطن، خلف سعد السندان - حائل، رشيد الهديرس - حائل، نايف مطرود الرويلي - عرعر.
لغز الأسبوع
كتبه للصفحة الشاعر سليمان إبراهيم الفرحان من رياض الخبراء ويقول:
ويش رجل على عنق العجوز
قادها لأمر شين ما تبيه
قامت بفعل شي ما يجوز
كل واحد له حساب يجيه