اللغز

الأسبوع الماضي كان لغز الأسبوع من طرح الشاعر/ عليثة عنيبر الحربي:
ويش الصديق اللي عن الناس يغنيك
يغنيك عن فزعة قريب الرفاقه
طول السنه ياصاحبه ما يخليك
وبعد السنه لازم تعيد الصداقه
وقد توصل للحل شعراً كل من:
لغزك هو (التأمين) من غير تشكيك
في مبلغ فلوسك تحدد نطاقه
(كفيلك) الجاهز بشبيك لبيك
على حسب تاريخ قص البطاقه
د. شائم الهمزاني - الرياض
ياللي نضمت اللغز ربي يعافيك
الناس شفقانه لحله شفاقه
تأمين سيارتك ينجيك ينجيك
اليا لحقك من الحوادث لحاقه
سعد بن سعيد الحارثي - الطائف
يابو عنيبر يا عسى الله يعافيك
لو كان فالتامين مالي علاقه
كل الخطوط اللي تجيبك توديك
ويبلشك فالطرقه غشيم السواقه
حمود بن زايد الدلبحي
يا مرحبابك يا عسى الله يعافيك
عساك ما تحتاج معه العلاقه
صداقته بالكاش ولا على شيك
ثم أدفع التأمين واخذ البطاقه
محمد عفار المطيري - عنيزه
يا عليثه يابن عنيبر الله يحييك
والغز له ناس تفكك وثاقه
حلّه هو التأمين والرب ينجيك
أمجد دينه حافظين البطاقه
صلاح بن عبدالله اليابس - رحيمه
يا عليثة إسئل وهل الادراك تنبيك
وشتان بين أهل الفهم واهل الحماقة
جابي التأمين ما فيه تشكيك
وأبرز شروطه كان رخصة سياقة
محمد هذال آل بريك
تامين قول امين ربي ينجيك
ولا يحملك شي على غير طاقه
اليوم دون افلوس ما حد مصافيك
لا تقارنونه بالرفاقه حماقه
سالم البشري
يابن عنيبر مرحبا يا هلا فيك
واللغز وارد والمواتر نطاقه
مع مكتب التأمين كمّل مساعيك
لا تم موضوعك نجيك البطاقه
علي رشيد الرشيد - رياض الخبراء
يا مرحبابك عد حي يناديك
عبر الصحافه نرسله لك بطاقه
الحل ذا التأمين زانت مغاليك
تشرب حليب ابكار حلو مذاقه
محمد ابودحيم - البدائع
في شركة التأمين ماني موصيك
ودفع فلوس ويمنحونك بطاقه
تأمين شامل وطلب الله يعافيك
والله يجنبنا البلاء والحماقه
فهاد عايض بن عمير - منطقة القصيم
يا عليثه حل اللغز يا صاح يأتيك
(تأمين) يفرض من جهات العلاقة
على مدار الحول ساري ويكفيك
صكات بقعاء وإن بدا فيه عاقه
علي بن فراج الفراج الشمري
يا بو عنيبر مرحبا الله يحييك
من مثلكم مكسب وشوفه شفافه
والحل تأمين عسى الله يعافيك
بالمركبة مربوط ربط العلاقة
سعد مويزر البدراني - الرس
لغز الأسبوع
كتبه للصفحة محمد غازي النفيعي من أبوظبي ويقول:
يا ويش ثنتين بلا أزواج واخوان
لا أم لا أبو والهن جماعه
أولهن اللي دمعها فوق الأوجان
والثانيه ما تنسي كل ساعه
نستقبل الحلول على الفاكس:
4871070أو الإيميل
khozama@alriyadh.com
كما نرحب بطرح لغز الأسبوع