اللغز

الأسبوع الماضي كان لغز الأسبوع من طرح الشاعر حمد علي الزقيحان من رياض الخبراء والذي يقول:
أنشدك عن عذرا لها بنت وجناح
واللي تزوره بنتها ما حمدها
يا كثر ما صاحوا من البنت صياح
وإن ماتت أم البنت ميت ولدها
وقد توصل للحل شعراً:
أنا حليت اللغز والبال مرتاح
الله ينجينا مصايب حسدها
العين حل اللغز من صابته طاح
الأسم عين ورمش والصبي ولدها
عبدالعزيز سند أبا الخيل الشيباني
الرياض
يا مرحبا ترحيبة عد مالاح
برق السماء وعداد مرزم رعدها
جاك الجواب اليوم من راع الأسياح
(العين) جعله ما يصيبه رمدها
ناصر بن راشد الشقيق - القصيم
يبو علي عساك طيب ومرتاح
وصفحة خزامى جت لنا في وعدها
واللغز مثل القفل يلزمه مفتاح
العين حل اللغز تسلم رمدها
محمد أبو دحيم - البدائع
عسى الامور اتزين وتحل الافراح
وتربع الديره ويكثر رغدها
والعين حل اللغز عساك مرتاح
الله يجير الناس غبة حسدها
علي رشيد الرشيد - رياض الخبراء
صفحة خزامى بالفضا عطرها فاح
يا طيبها والكل منا حمدها
اللغز حله يوم في خاطري لاح
العين يا رب اكفنا من حسدها
يزيد أحمد الطيار
حفر الباطن
يا مرحبا ترحيبه يبداها صلاح
لهل الخزاما والنشاما ردها
النظله مع بعض الرجاجيل الاشحاح
أهل الحسد يرجع عليها حسده
صلاح بن عبدالله اليابس
رحيمة
أهلاً وسهلاً عد ما تهب الارياح
واعداد ما تمطر وينزل بردها
العين حل اللغز وتءمثِّل اسلاح
لا قام شخص للخلايق حسدها
فالح غازي الحربي - رياض الخبراء
يا مرحبا ترحيبة نورها لاح
بك يا حمد قدر النجوم وعددها
مع رمعة جتني على ظن وإنصاح
"العين" رمعة صاحبك واعتمدها
عقاب بن سقيان العتيبي
"الجمش"
يا مرحباً عداد ما باراق لاح
من المزون اللي تهشم رعدها
(والعين) تسعد في لقاكم وترتاح
هذا جواب اللغز جاء في وعدها
محمد عبيد الديحاني
القصيم
ياما حلا المقناص والطير لا طاح
مع شلة اقروم قليل عددها
حنا نحل اللغز والقلب مرتاح
راجع طبيب (العين) لا جا رمدها
عبدالرحمن منصور التركي - البكيرية
لغز الأسبوع
كتبه صالح عبدالله الزرير التميمي من الرس ويقول:
رجل قتل والده عمدان
والرب باللي فعل راضي
تسعه اخوانه بلا نقصان
اللي لهم صيت بالماضي
نستقبل الحلول على الفاكس 4871070أو الإيميل khozama@alriyadh.com كما يسرنا مشاركتكم بالألغاز الجيدة.