اللغز

الأسبوع الماضي كان لغز الأسبوع من طرح الشاعر أحمد المحرج من الرياض والذي يقول:
ابنشد الشعار واللي يرمعون
من فكر صافي يقدحون زنادها
ورع نحيل الجسم ياللي تسمعون
يعطيك علم اكيد يانشادها
ما قد نطق ولا من اللي يكذبون
ما يجامل امه أو يروم اسعادها
دايم على راسه يطيح ولا يهون
في غبة ظلما عليه اشدادها
وقد توصل للحل شعراً:
سر يا قلم واكتب عن امري لا تهون
اكتب حلول الغاز فكري جادها
حلة عيار الزيت سطرها بدون
بدون شك الحل فكري صادها
سلطان بن حمد الحبابي - الطائف
اللغز يا أحمد واضح للي يبون
حله ولا يحتاج بذل أجهادها
عيار المكينه لا طلع قدم العيون
يعطيك نقص الأم وإلا زادها
بامتي فايز السبيعي - الاحساء
يا أحمد المحرج نجاوب لا تهون
بيوت اللغز بيّن زود اعدادها
عيار الزيت واضح للي يعرفون
وسط المكاين غاطس باكبادها
علي رشيد الرشيد - رياض الخبراء
هذا عيار الزيت ياللي تسمعون
سيارتك لازم تشوف اعدادها
الزيت لا ينقص ترى غيره يهون
حافظ عليها لا تجيك ابيادها
محمد أبو دحيم - البدائع
ياللي كتبت اللغز جعلك ما تهون
ولا كل من يرمي الضريبه صادها
هذا عيار الزيت ما فيها ظنون
خذ رمعتي والعارفين اشهادها
ساير فالح الحنيني - الخرج
عندي جواب اللغز والمحرج يمون
والمعرفة دايم لها روادها
حلة عيار الزيت ما غيرة يكون
يبدى المهمة لا وقف عدادها
محمد هذال آل بريك
الحل صيده والاوادم ينبلون
أحد أيجنبها واحد يصطادها
والحل عندي والعوارف يشهدون
حله أعيار الزيت يا نقادها
مبارك بن فراج السبيعي - رماح
بذكر المعبود ياللي تسمعون
نعمة الله خاسر جحادها
عارف اللغز ياللي تكتبون
ذاك عيار الزيت فكري صادها
عوض شبيب القحطاني
يا الشاعر المحرج ترانا مبدعون
ما تصعب العقده على عقادها
الحل ما يصعب على العقل الفطون
الحل عيار الزيت جاك اوكادها
صنت عوض القريباني
كما توصل للحل على وزن آخر: حمد عبدالله الوايلي/ حوطة سدير، هادي عوض الحربي/ قبة.
لغز الأسبوع
كتبه للصفحة الشاعر/ باني فايز السبيعي من الاحساء ويقول:
يا ويش رجل يدخل باسم معروف
وليا خرج اسمه تغير حروفه
السمع يدري به ويجهل به الشوف
يمر بسهوله ونوب بكلوفه
نستقبل الحلول على الفاكس
4871070أو الإيميل
khozama@ alriyadh.com
كما نرحب بطرح الألغاز الجديدة.