اللغز

الأسبوع الماضي كان لغز الأسبوع من طرح الشاعر/ ياسر السويس من الرياض والذي يقول:
انشدك عن توم مهم يتفارقون
مع طول فترة حلهم متخالفين
على الفراق لغيرهم يتعاونون
من شانهم روس خضعت غصب وتلين
وقد كانت حلول الشعراء:
اقول يا ياسر عساكم تسلمون
ومعني تاصلك باللغز الثمين
المقص الحل جعلك ما تهون
يشتغل في مهنته بين اصبعين
عبيد فنيس الوهبي.بريدة
يأهل الألغاز يالي تبدعون
لغزكم معروف عند المبدعين
لغزكم هو المقص بلا سنون
عارفينه وماسكينه باليدين
خليل عثوان الحبيلي.الرياض
تومٍ على مر الزمن يتلازمون
دايم تلاقيهم ترى متعاونين
مقص يقطع أكثر اللي يرغبون
من القماش يفصله لو هو متين
أحمد بن ناصر المحرج.الرياض
التوم يا ياسر لقيناهم يجون
داخل مقص وكل الأمة خابرين
مع كل خياط إلا جاه الزبون
واللغز وارد والجماعة شاهدين
صلاح بن عبدالله اليابس.رحيمة
مرحبا يابن سويس ولا يهون
مشرف الصفحة وكل متابعين
توم باطراف المقص يتعانقون
وفي معانقهم فراق القطعتين
علي عبدالعزيز علي الصالح. حائل
لغزكم هو المقص بلا ظنون
ومعروفن عند كل الفاهمين
له خياطين الملابس يشترون
هذا حله وأنا شيخ العارفين
فرج ظاهر الغرنوق.الرياض
كما توصل للحل نثراً:
عبدالرحمن السواجي، خلف عائد السحوم/ بريدة، عبدالرحمن إبراهيم المشعل، هادي سعد الدوسري.
كما أن هناك حلولاً شعرية على وزن آخر:
بلهون ياللي ترمع اللغز بلهون
حله مع التفكير ينحل ويبين
قلنا مقص اللي من السوق يبشون
بوقتن مضا ونقول ذلحين ذلحين
سعد بن صنهات السهلي.الدرعية
مقصّ حلاق له خنوك وسنون
تسمع لها بالصوف حسك وتلحين
تخضع له ارقاب تعالت عن الهون
وتحز نواصي رجال عزيزين
عبدالله الحربي .الرياض
يالي لرمز اللغز دايم تحلون
هذا المقص ويقسم الواحد ثنين
نا عرفت الحل ونتم تعرفون
واللي يحلونه رجالن كثيرين
عبدالعزيز سعود عيد الدوسري.الدرعية
لغز الأسبوع
كتبه للصفحة الشاعر/ محمد الرشيد من الرياض ويقول:
بنت تعيش من المصايب وتعتاش
معسوفة تلقى ظهرها تقل كف
له موقف بين الملا يبرد الجاش
في حكمها ما ينفعك كثرة اللف
تصغر لها روس ويدفع لها كاش
لا ضاعت الحيله وحيل الفتى جف
نستقبل حلول اللغز على الفاكس: 014871070.
ويفضل الإرسال عبر الإيميل:
rb-khozama@alriyadh.com.
ونرحب بطرح الألغاز