اللغز

الأسبوع الماضي كان لغز الأسبوع من طرح الشاعر فالح غازي الحربي من رياض الخبراء والذي يقول:
عيال لهم نفع ومشاكل كثيرة
إن اصبحوا عارين ما يوجد لحاف
وسط البحر والبر في كل ديره
فيهم أمان ومنهم احيان ينخاف
من جنبوا داره نجومه كثيره
واللي يجون بديرته خير وارياف
وقد توصل للحل شعراً:
بالمملكة نهضة وربي كبيرة
والكهربا عمت مدنها والارياف
واسلاكها إحذر لا يلامس عشيره
تجي خساير للأماكن بالآلاف
سعد مويزر مشعان البدراني - الرس
يا مرحباً ترحيبه مستنيره
لأهل الخزامى عطرها ورد وأصناف
وهذا جواب اللغز وما فيه غيره
أسلاك كهرب فيها ألوان ونحاف
حمد عبدالله الوابلي- حوطة سدير
الشاعر يحتار بين حيرة وحيرة
شاعر ماني للجواب خطاف
الحل الكهرباء في كل ديره
واسلاكها على البعد تنشاف
حمد فيحان الغبيوي
عساك يا فالح قوي البصيره
وانته تصيب وللهدف صرت هداف
واللغز واضح له نتايج خطيره
أسلاك كهرب عدة أشكال وأصناف
علي رشيد الرشيد - رياض الخبراء
جاكم جواب اللغز ما نستعيره
من فكرتاً جبناه والنور ينشاف
لا تقرب الاسلاك بعضه خطيره
لا صار دون الحاف للدم رشاف
محمد أبو دحيم - البدائع
لغزك خطير كالسيوف الشطيره
أسلاك كهرب عاريه ما به اغلاف
لو تنطفي اللمبات عميت امطيره
واللي يريد انجوم بالبر تنشاف
غادة السلطان - الرياض
يللِّي قريت اللغز فكرك تديره
مبعد وحلِّه فوق راسك وينشاف
أسلاك كهرب مالها حل غيره
فيها الخطر والخير من كل الأصناف
فهد بن عقيل الطويان - بريدة
مني تحيه للوجيه السفيره
اللي بها غيره على الدار وتخاف
كيابل الكهرب ولو هي خطيره
يوجد عماله سايبه تسرق الياف
صلاح بن عبدالله اليابس- رحيمة
سلام لاهل المعرفه والبصيره
اللي لهم بالطيب مبداء وميقاف
واللغز له رمعه ولا فيه غيره
أسلاك للكهرب وبالعين تنشاف
محمد عفار المطيري - عنيزة
لغز الأسبوع
كتبه للصفحة الشاعر صالح بن هايل الفقير العنزي من حائل ويقول:
أسألك عن ثنتين يا طيب الساس
يدعى لهن في يوم مره ومره
اللي حضرهن يحسبن له مع الناس
ومن لا حضرهن يدبلن في مقره
هن بالمدينه والقرايا بها تقاس
ولا حد ذكر بالباديه لهن جره
نستقبل الحلول على الفاكس 4871070أو الإيميل: khozama @alriyadh.com
كما نرحب بطرح الألغاز التي تستحق النشر.